Базаралы Ихметұлы Иманқұлов

Иманқұлов Базаралы Ихметұлы (1.9.1940, Көксу ауданы, Көкбастау ауылы — 16.1.2002. Алматы қ.) — өнертапқыш, отандық өндіріс ұйымдастырушысы, техникалық ғылыми кандидаты (1985), "КСРО-ның еңбек сіңірген металлургі" (1980). 1957 ж. Көксу ауданы Мұқыр орта мектебін, 1962 ж. Қазақ тау-кен институтын бітірген. 1962-85 ж. Ертіс полиметалл комбинатының мыс қорыту зауытында балқытушы, цех бастығы, бас инженер, директор болды. 1985-91 ж. Бүкілодақтық түсті металдар ҒЗИ-нда жетекші ғылыми қызметкер, ҚХР-дағы Халатун мысникель зауытында кен өндіру технологиясын жетілдіріп, өндіріске енгізу ісінің ғылыми жетекшісі, 1991-2000 ж. Шығыс Қазақстан облысы бойынша жекешелендіру комитеті төрағасының 1-орынбасары. 2000 жылдан "Зырьян қорғасын комбинаты" ААҚ директорлар кеңесінің төрағасы қызметін атқарды. Ғын. еңбектері Қазақстан металлургиясы технологияларын жаңартуға, оның ішінде мыс, мырыш, қорғасын балқыту процестерінің тиімді жолдарын іздестіруге арналған. 30 дан аса ғылыми еңбектің, 6 ғылыми жаңалықтың авторы. "құрмет белгісі" орденімен, бірнеше медальмен марапатталған.