Балаларға арнап жаза береміз

«Балаларға арнап жаза береміз» («Будем писать для детей»), жазушы М.О.Әуезовің мақаласы. «Ленинская смена» газетінде 1940 ж. 20 қаңтарда «Қазақстанда балалар әдебиетінің тууы» айдарымен жарияланды. Мақалада Әуезов оқырмандар мен жасөспірімдерден балаларға арнап кітап жазуды өтінген хаттардың көп келетінін айта келіп, бұл салада шығармалар тудыру оңай іс емес екеніне айрықша назар аударады. Ол өзінің негізінен екі жанрда - драматургия және проза саласында еңбек ететінін атап көрсетеді. Балаларға кітап жазу үшін жазушыға баланың ой-өрісіне сәйкес ойлай білу, тартымды тіл, бала қабілетіне сай, оны қызықтырар тақырып таба білу талаптары қойылатынын ескертеді. Балалар әдебиетінің стилі мен тақырыбы ғана емес, оның мазмұны жеңіл әрі қызықты шығып, оқырманның бойына адамгершілік, ізгі қасиеттерді еге білетін тәлімгер ұстаз, сенімді дос болуы да аса қажет. Егер бала қиялындағы жеке тұлғаны сомдауға қызмет ете алса ғана, балаларға арналған кітап өзінің негізгі мақсатына жете алады дейді автор. Ол балаларға арналған пьеса жайында ой толғап, Қазақстанда жастар мен балаларға арнапған театрдың жоқтығына қынжылыс, өкініш білдіреді. Мақала соңында автор болашақта Қазақстанда балалар мен жасөспірімдер үшін әдебиет пен мәдениет саласында көптеген игі істер атқарылатынына зор сенім білдіреді.