Барлау мәліметтері

Барлау мәліметтері (орыс. Разведывательные сведения) — ұрыс алдында, сондай-ақ ұрыс барысында шешім қабылдау үшін командирге қажет болатын қарсылас, жергілікті жер, метеорологиялық жағдай және т.б. туралы мәліметтер. Бөлімше мен бөлім командирлері Барлау мәліметтерін барлаушы бөлімшелерден, бақылау постарынан (бақылаушылардан), тұтқындардан жауап алу және т.б. жолдармен алады. Барлау мәліметтерінің маңыздылығы олардың мазмүнымен, шынайынығымен, қалыптасқан жагдай шарттарына байланысты айқындалады. Барлау мәліметтерінің нактылығына қарай олар анық, ықтимал, күмәнді және жалған болып бөлінеді.

Барлау шолғыны

Барлау жасағында әрекет етуші батальоннан (ротадан) жіберілетін тактикалық барлау органы. Құрамадан (бөлімнен) жіберілген барлау шолғыны жеке барлау шолғыны (ЖБШ) болып тағайындалады. Әдеттегі барлау шолғыны (ЖБШ) құрамына саперлермен және басқа мамандармен күшейтілген взвод кіреді. Барлау шолғыны (ЖБШ) барлау үшін бағыт немесе объекті мен міндеттер алады. Барлау шолғыны өз міндеттерін бақылау, торуылдау, шабуылдау, ал қажет болған жағдайда ұрыс жүргізу арқылы орындайды.

Барлаушы жер серігі

Орбитаға шығарылған жасанды жер серігі. Ол арнайы барлау құралдарымен жабдықталып, барлау мәліметтерін табуға арналады. Барлаушы жер серігінің көмегімен қарсыластың жер үсті объектілері, теңіз, әуе және ғарыштық нысаналары туралы мәлімет алуға болады. Барлаушы жер серігі алынған барлау мәліметтерін Жерге теледидар арқылы немесе контейнерлер тастау арқылы жеткізеді.

Барлаушы топ

Ұрыстың жылжымалы түрлерінде, сондай-ақ қарсыласпен түйіспеген қорғаныс кезінде қарсылас пен жергілікті жерге барлау жүргізу үшін құрамалар мен бөлімдерден арнайы жіберілетін әскери барлау органы.

Барлаушы ұшақ

Әуе барлауын жүргізуге арналған, арнайы техникалық жабдықтары (аэрофотоқондырғы, радиолокациялық қондырғы, т.б.) бар әскери ұшақ. Барлаушы ұшақ жер бетіндегі, әуедегі және теңіздегі нысаналарды (қарсыластардың объектілерін) әуеден барлап, олар жөніндегі мәліметтерді авиациялық басшылық орындарына береді.