Беженев

Беженев — Сандықтау ауданының қиыр шығысындағы тау. Қоңыр және Аршалы өзендерінің аралығында, Балкашино ауылынан солтүстік-шығысына қарай 50 км жерде орналасқан. Абсолютті биіктігі 517 м. Солтүстік-батыс және батыс беткейлері Қоңыр өзеніне және оның саласына қарай тік құлайды. Қалған беткейлері көлбеулеу, сай-жыра, шұңқырлармен тілімделген. Тау батыстан шығысқа қарай 10 — 12 км-ге созылған, ені 6 — 7 км. Бірнеше тау бастары айқын көрінеді. Құмды-сазды элювийлі-делювийлі шөгінділермен жабылған төменгі протерозойдың жыныстарынан түзілген. Сортаңдау және нашар дамыған қара топырағында бетеге аралас әр түрлі шөптесіндер және петрофитті-сұлыбасты өсімдіктер өскен.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл. ISBN 5-89800-123-9, II том