Биіктік өлшеуіш

Биіктік өлшеуіш - аэрофототүсірілім кезінде суретке түсірілетін нүктелердің биіктігін анықтау үшін қолданылатын аспап. Радио және лазерлік Биіктік өлшеуіштер қолданылады. Радио биіктік өлшеуіш импульстік әрекетті радиолокатор болады және таратқыштан, қабылдағыштан және индикатордан тұрады. Экспозиция кезеңінде таратқыш жерге бағытталған электромагниттік толқындар импульсінің сәулесін таратады, олардың жерден шағылған біразы қабылдағышпен ұсталады да индикаторға түседі. Сәуленің таралу импульсі кезеңінен шағылған импульсті қабылдағанға дейінгі уақыт аралығы оның өткен жолының ұзындығына пропорционал болады, ал индикатордың шкаласы суретке түсіру сәтінде ұшақтан жерге дейінгі қашықтықты көрсететіндей болып жасалған. Аэрофототүсіріс кезінде экспозициялау сәттерінде қосымша камерамен аэрофотосуреттер мен индикатордың нөмірлегішінің көрсеткіштері суретке түсіріледі, осы арқылы бүл керсеткіштердің қай аэрофотосуретке катысты екенін анықтауға болады. Лазерлік биіктік өлшеуіштің радиобиіктік өлшеуіштен ерекшелігі онда электромагниттік толқындарды сәулелеп таратудың көзі ретінде оптикалық кванттық генератор — лазер болады, осы арқылы жарықтық сәулелену бағыттылығының бір жақты тар диаграммасы қамтамасыз етіледі. Сондықтан суретке түсіру биіктігін анықтау дәлдігі жоғары болады.