Блек Александр Львович

Блек Александр Львович (1861 - ө. ж. белгісіз) - халықшыл-революционер. Петербург университетінің заң факультетінде оқыған. 19 ғ.-дың 80 жылдары «Халық еркі» және «Қаралай бөліс» ұйымдарымен тығыз байланыс жасап тұрған студенттердің революциялық құпия үйірмелерін ұйымдастырушылардың бірі болды. 1882 ж. революциялық басылымдарды таратқаны және Гельсингфорстағы үйірмелермен байланыс жасағаны үшін тұтқынға алынып, полицияның ашық бақылауымен 5 жылға Батыс Сібірге жер аударылған. 1883 ж. мамыр айынан Семейге ауыстырылып, статистика комитетінде жұмыс істеді. Ол заң ғылымының маманы ретінде саяси жер аударылған А. Леонтьев және С. Гросспен бірге 1886 ж. «Қырғыздардың заң жөніндегі әдет-ғұрыптарын үйренуге арналған материалдар» деген басылым шығаруға қатысты. Онда революцияға дейінгі қазақтың заң дәстүрі жөніңде бағалы қазына болып табылатын нақты деректер жинақталып қорытылған. Абай Семей облысы статистика комитетінің қызметі барысында онымен жақын таныс болды. Блек және басқа саяси жер аударылғандар ақынның дүниетанымының қалыптасуына, заң, экономика және социология салаларынан білімінің кеңеюіне игі әсер етті.^[1]