Борис Дмитриевич Греков

Дүниеге келгені:	3.5.1882 Украина, Миргород, қазіргі Полтава облысы
Қайтыс болғаны:	9.9.1953 Мәскеу қ.
Мансабы:	орыс тарихшысы

Борис Дмитриевич Греков (3.05.1882, Украина, Миргород, қазіргі Полтава облысы – 9.9.1953, Мәскеу) – орыс тарихшысы. КСРО Ғылым Академиясының академигі (1935).

1937 жылдан КСРО Ғылым Академиясы Тарих институтының, 1944–1946 ж. бұған қоса Мәдени мұра тарихы институтының, 1947–51 ж. Славянтану институтының директоры, 1946–1953 ж. КСРО ҒА Тарих және философия бөлімшесінің акад.-хатшысы болған. Г-тың ғылым-зерттеулері, негізінен, Ресей мемлекетінің құрылуы, ертедегі орыстардың көршілес түркі халықтарымен өзара қарым-қатынастары мен татар, башқұрт, тәжік, түрікмен, өзбек халықтарының тарихына арналған. Г. – «Киев Русі» (1939) аталатын күрделі еңбектің авторы. Оның А.Ю.Якубовскиймен бірігіп жазған «Алтын Орда» (1937), кейіннен толықтырылған «Алтын Орда және оның құлауы» (1950) атты еңбектерінде Алтын Орда мен Русь арасындағы саяси қарым-қатынас, Шыңғыс хан ұрпақтарының жаулап алған жерлерде жүргізген басқару жүйесі, әскери тактикасы туралы маңызды деректер келтірілген, Г., әсіресе, Батудың жорықтарына көбірек көңіл бөледі.