Бұрыш (дәм)

Бұрыш (дәм, татымдық) . Ас пісіруге қара, ақ, хош иісті қалампыр бұрышы және қызыл бұрыш (ұнтақталған) қолданылады.

• Қара және ақ бұрыш — бұрыш тұқымдас тропиктік өсімдіктердің кептірілген жемісі. Қара бұрыш алу үшін жемісті піспеген кезінде ағаш басынан алып кептіреді, ал ақ бұрыш алу үшін жемісті толық піскен кезінде ғана алады. Қара және ақ бұрыш бір-бірінен тек түрі жағынан ғана емес, ащылығы, иісінің өткірлік және дәмділігі жағынан да өзгеше болып келеді: қара бұрыштық дәмі ащы, өте өткір хош иісі бар. Тағам дайындағанда оның жемісін бүтіндей немесе ұнтақталған түрінде пайдалануға болады. Түйір бұрыш сұйық тағамдарға, көкөніс тұздаған кезде, соусқа, ет пен балық пісіргенде немесе бұқтырғанда т. б. пайдаланылады. Бұрышты тамақ дайын болуға жақындаған кезде салу керек. Өйткені көп қайнаған бұрыш қышқылтым дәм береді. Тұздық, фарш дайындауға ұнтақталған қара және ақ бұрыш пайдаланған жөн.
• Хош иісті қалампыр бұрышы — мирта тұқымдас тропикалық өсімдіктердің шала піскен жемісі. Сыртқы түрі қара бұрышқа ұқсас, ал түйірі ірі болып келеді. Сыртқы беті жылтыр, қарақоғыр түсті. Қалампыр бұрышты (түйір немесе ұнтақталған күйінде) тұздық ретінде, сұйық тамақтар дайындауға қолданады. Бұрыш беті мұқият жабылған ыдыста, құрғақ жерде жақсы сақталады.
• Ащы бұршаққынды бұрыш (қызыл) — алқа тұқымдас көкөніс өсімдіктерінің жемісі. Әсіресе көп тараған сорттары: Украинский, Горкий, Астрахань 147, Маргелан 330. Жіңішке және ұзын бұршақтары өте өткір хош иісімен, тәтті дәмділігімен ерекшеленеді. Қызыл бұрыш жемісін бүтін немесе ұнтақталған күйінде келтіреді. Оны сұйық тамаққа, бұқтырылған етке пайдаланады. Ұнтақталған бұршаққын,ы бұрышты қара бұрыш сияқты тұздық ретінде де қолданылады. Бұрыштық бұршағын құрғақ жерге іліп қойып, қыс бойы сақтауға болады.