Валюталық низам

Валюталық низам, валюталық заңдар — ел ішінде, одан тысқары жерде валюталық құндылықтарға қатысты әртүрлі мәмілелер жасаудың, сондай-ақ ұлттық, шетелдік валюталарды, т.б. құндылықтарды алып келудің, сыртқа шығарудың, аударым жасау мен жолдаудың тәртіптерін белгілейтін құқықтық-нормативтік актілердің жиынтығы. ҚР Президентінің 1993 ж. 12 қарашадағы “Қазақстан Республикасының ұлттық валютасын енгізу туралы” жарлығы елімізде валюталық низамның дамуына негіз қалады. Бұл заңдар, ақша айналымының құқықтық негіздері мен ұйымдастыру пішімдерін айқындай отырып, ақша жүйесінің бүкіл басты нышандарын қамтиды. ҚР Президенті мен Үкіметі өз құзыреттерінің шегінде валюталық реттеу саласына қатысты нормативтік актілер қабылдай алады. Еліміздегі валюталық низам жүйесін “Шет ел инвестициялары туралы” (27.12. 1996), “Валютаны реттеу туралы” (24. 12.1996), “Тікелей инвестицияларды мемлекеттік қолдау туралы” (28.2. 1997), “Құнды қағаздарға қатысты мәмілелерді тіркеу туралы” (5.3. 1997), “Қазақстан Республикасының вексельдік айналымы туралы” (28.4. 1997), “Құнды қағаздар рыногы туралы” (5.3.97) заңдар құрайды.