Гауһар Дәуленқызы Зақұмбаева

Гауһар Дәуленқызы Зақұмбаева - 1932 жылы 1 қаңтарда Шымкент қаласында туған. Қазақ.

Әкесі - Дәулен Нетәліұлы Неталиев, марқұм, Ұлы Отан соғысы қатысқан, инженер болып жұмыс істеген. Анасы - Марфуға Себғатқызы Неталиева, марқұм.

С.М. Киров атындағы Қазақ мемлекеттік университетінің химия факультетін бітірген (1954), химик, катализ саласының маманы.

Химия ғылымдарының кандидаты (1961), докторы (1971). Докторлық диссертациясының тақырыбы: «Кезеңдік жүйенің VIII тобы металдарының адсорбциялық және катализдік қасиеттерін зерттеу». Профессор (1972). ҚР ҒА академигі (1994).

«VIII топ металдарындағы адсорбция мен катализ» (1973), «Органикалық қосылыстардың VIII топ металдарының беттерімен өзара әсері» (1982), «Металдық катализаторлар» (1982), «Жоғары бөлшектік металдық катализаторлар» (1987), «Синтез-газды катализдік қайта өңдеу» (2000) тәрізді 8 монографияның; Халықаралық және республикалық басылымдар, конференциялар, конгрестер және симпозиумдарда жарияланған 500-ден астам мақалалар мен баяндама тезистерінің авторы. 67 патенті және авторлық куәлігі бар.

КОКП мүшесі (1972-1991).

1954 жылдан - ҚазКСР ҒА Химия ғылымдары институтының аспиранты, аға зертханашысы, кіші ғылыми қызметкері, аға ғылыми қызметкері, зертхана меңгерушісі. 1969 жылдан - ҚазКСР ҒА (1995 жылдан ҚР БҒМ) Органикалық катализ және электрлі химия институты директорының орынбасары, зертхана жетекшісі, 1988 жылдан - директоры, бас ғылыми қызметкері.

Республикалық «Бейбітшілік үшін күрес» қоғамы төрағасының орынбасары (1975-1985); ҚР Президенті жанындағы «Әйелдер, отбасы және демографиялық саясат» Республикалық Кеңесінің мүшесі (1992-1998); РҒА «Нефтехимия» және РҒА «Электрохимия» ресейлік журналдары редакциялық алқаларының мүшесі; ҚР Премьер министрі Д.К. Ахметов басқаратын Жаңа индустриалдық саясат кеңесінің мүшесі.

ҚазКСР ғылым және техника саласындағы Мемлекеттік сыйлығының лауреаты (1974). ҚазКСР Еңбек сіңірген ғылым қайраткері (1982). «Құрмет» орденімен (1999), медальдармен марапатталған.

Қызы - Зарема Әбдірахманқызы Зақұмбаева. Немерелері -Темір, Төлеген.