Германия басылымдарына тән ерекшеліктер

Германия басылымдарына тән ерекшеліктер – 1. Неміс басылымдарының аймақтық сипаты басым. . Бұған себеп-бірнеше ғасырларға созылған феодалдық бытыраңқылық болса керек. Мәселен, бүл елде 420 газет шығатын болса, соның 400-і жергілікті жаңалықтарды дер мезгілінде, нақты жеткізетін аймақтық басылымдар санатында.

2.Таңертеңгілік газеттердің басымдылығы байқалады. Қатары шағын кешкілік газеттердің ішіндегі көрнектісі- "Гамбургер абендблат" (1948 жылдан бастап шығады, тиражы 280 мың дана). Сондай-ақ соңғы кездері жексенбілік газеттердің беделі өсіп, қатары да көбейген. Мәселен, 1989 жылы экс-ГДР-да бірден-бір жексенбілік басылым болмаса, 1993 жылы жексенбілік газеттің саны 25-ке жеткен.

3.Партиялық басылымдардың беделі төмендеген. Барлық газет- журналдар таралымының 10%- ын ғана құраған. Партиялық басылымдардың таралымы шағын, негізінен партияның активтеріне арналған. Христиан-демократиялық одағы "Унион ин Дойчланд" (1946 жылы) журналын 10 күнде бір рет шығарған. Христиан-әлеуметтік одағы "Бейернкурир" (1950 жылы) апталық газетін шығаруда. Ертеден шығып келе жатқан социал-демократ, партияның органы "Форвертс" (1976 жылы таралымы - 57,6 мың дана) апталық газеті қаржылық қиыншылықтардан шыға алмай, 1989 жылы жабылып қалған. "Жасылдар партиясының" басылымдары - "Грюнен" (1979, таралымы - 200 000 дана) апталық газеті, "Грюнен базисдинст" журналы. "Жасылдар" басылымдарының құрылымы қызық. Бұларда әдеттегідей қызметтегі шенге бөліну жоқ. Мәселен, бас редактор, жауапты хатшы, корректор, еден жуушы болып бөлінбейді. Редакция қызметкерлері бұл жұмыстарды кезектесіп атқарады. Жобаның авторларының ойынша, бұл жүйе қарым-қатынастың жаңа түрін әкелді, редакция ішіндегі бәсекелестік жоқ, ымыраға келушілік күшейді деп есептейді.

4. Жеке капиталдардың электронды бұқаралық ақпарат құралдарына, әсіресе, теледидарға шабуылы күшейе түскен.

5. Рудольф Моссе, Леопальд Ульштейн, Август Гук, Август Шерльдер негізін қалаған баспасөздің шоғырлануы жоғары деңгейде. Қазіргі кезде Германияда шығатын газет-журналдардың (75%) дені бес ipi концерндерге қарайды.