ДУА

Дуа - адам ағзасы мен психикасына зиянды ықпал жасауға бағытталған қарау әрекет атауы. Көбінесе, ерік-жігері әлсіз, тылсым күштердің болатынына сенгіш адамдар зардабын тартады. Дуаны дуақандар жасайды. Дуа жасау үшін дуақандар кері оқитын арнаулы діни дұғаларды пайдаланып, адам суретіне дем салады, кері дұғалы тұмар береді, адамның үйі мен жұмыс орнына әр түрлі заттарды кері оқып тастайды, шашады немесе сыйлыққа береді, біреу арқылы сәлемдеме етіп жібереді, киімінің қалталарына, алып жүретін заттарының ішіне білдірмей кері оқылған нәрселерді салып қояды, шайға, басқа да сусындарға, тағамдарға кері дем салады. Дуаланған адамда бас ауру, әлсіздік, жүйке ауруы (ұйқысыздық, үрей, шошу), бедеулік пен белсіздік, буын, іш құрылысы, сал аурулары, қатерлі жаралар пайда болуы мүмкін. Отбасындағы берекесіздік, жақын адамдардың ұрыс-керісі, адам ісі алға баспай, қабілетінен, дәулетінен айрылу, себепсіз үй-мүлкін біреуге беру, есінен тану, дуақанның ырқына көну, туысын ұмыту, т.б. құбылыстар — дуа алған адамға тән. Құран Кәрімде дуа ең ауыр күнәлардың бірі ретінде айыпталады.

Дереккөздер

Қазақ энцклопедиясы