Дара басшылық

Дара басшылық — әскери бөлімшені, бөлімді және құраманы жеке командирдің басқаруы.

Оның қолында әскерлерді басқарудын барлық тәсілі — командалық, саяси, әкімшілік, техникалық, шаруашылық және бақылау құқығы болады.

Дара басшылық — әскерді басқарудың ең қолайлы түрі. Ол әскерлерді басқарудың бірлігі мен бір орталыққа бағынуын, басқарудың тиянақтылығын, икемділігін, оперативтілігін нығайтады, жауынгерлерді оқыту мен тәрбиелеуді, әскери тәртіпті күшейтуді, алға қойған міндеттерді орындау үшін материалдық-техникалық жабдық пен адам күшін тиімді пайдалануды, жауынгерлердің ұйымшыл болуын, жоғары орындардын бұйрықтарын, жарғы талаптарын орындауын қамтамасыз етеді.

Дара басшылық принципіне сай басшы қол астындағыларға толықтай билік жүргізіп, барлық сала бойынша жеке өзі жауапкершілік арқалайды. Ұжым мүшелерімен ақылдасып, жеке дара шешім қабылдайды, бұйрық беріп, үкім шығарады, олардың орындалуын қадағалайды. Дара басшылық Кеңес Одағы кезіндегі өндірісті әкімшілдік-төрешілдік басқару тәсілінің негізгі принципі саналды; жүктелген міндеттерді ойдағыдай атқарып, тапсырылған іске қатысты қызметкердің іске жауапкершілігін арттыру үшін әртүрлі деңгейдегі марапаттау, ұйым басшыларына Дара басшылық жасау құқы берілді. Қазіргі кезде әскери бөлімдер мен құрамаларда, құқық қорғау oргандарында, сондай-ақ келісімгерлікпен, коммерциямен шұғылданатын әр алуан меншік сипатындағы ұйымдарда басқарудың осы принципі сақталған. Ол ұйымдық-өндірістік шараларды жедел атқарып ұжымдағы тәртіп пен моральдік-психологиялық ахуалды нығайтуға, жұмыс күшін тиімді пайдаланып, еңбекті ынталандырудың оңтайлы жолын таңдауға, т.б. мүмкіндік береді.