Добротин Николай Алексеевич

Добротин Николай Алексеевич (18 маусым 1908 жылы туған, Ресей, Пенза қаласы) – физика-математика ғылымының докторы (1948), профессор (1951), Қазақстан Ғылым Академиясының академигі (1967), Қазақ КСР-інің еңбек сіңірген ғылым қайраткері (1982).

Дондағы Ростов қаласындағы Солтүстік Кавказ мемлекеттік университетін бітірген (1929). Сол қаладағы Энергетика институтының оқытушысы (1929–31), КСРО Ғылым Академиясының Физика институтында аспирант, аға ғылыми қызметкер, лаборатория меңгерушісі, директордың орынбасары (1931–76), КСРО Ғылым Академиясы Төралқасының ғылыми хатшысы (1950–55) қызметтерін атқарған. Қазақстан Ғылым Академиясының Жоғары энергия физикасы институтында лаборатория меңгерушісі (1968–76), директордың орынбасары, Қазақстан Ғылым Академиясы Төралқасының мүшесі, Физика-математика бөлімшесінің академик-хатшысының орынбасары (1976–87) болды. 1987 жылдан зейнеткер. Мәскеуде тұрады. Негізгі ғылыми еңбектері атом ядросы мен ғарыштық сәулелер физикасына арналған. КСРО Мемлекеттік сыйлық лауреаты (1951). 3 рет Еңбек Қызыл Ту орденімен, медальдармен марапатталған.^[1]