Дүниежүзілік маңызы бар оқиға

«Дүниежүзілік маңызы бар оқиға» («Со­бытие мирового значения»), Мұхтар Әуезовтің мақаласы. 1955 ж. 31 желтоқсанда «Литератур­ная газетада» шықты. Қазақша нұсқасы «Қазақ әдебиеті» газетінің 1956 жылғы 6 қаңтардағы санында жарияланды. Кеңес өкіметінін мақсаты - дамушы елдерді өзіне қаратып, жақтас етуге тырысқаны, оларға қаржы, техника, әскери қаружарақ жатынан көптеген көмек бергені тарихи факті. КСРО-ның бұл әрекеттері көп жағдайда нәтижелі болып, дамып келе жаткан Азия, Африка, Оңтүстік Америка елдерін өзіне жақындатып, өз жемісін берді. Мұхтар Әуезовтің мақаласы КСРО-ның осы саясатын қуаттау, бұл сапарда Н. Булганин мен Н. Хрущевтің қол жеткізген келісімдерін қолдау ниетін білдіреді. Совет Одағы барлық бейбітшілік сүйгіш елдердің рухани күшті қуаттауын сезіне отырып, халықаралық жағдайдың шиеленісін бірсыпыра әлсіретуге өзінің мол күш-жігерін жұмсады деген автор бұл жайында. Мақала негізінде тапсырыспен жазылғанға ұқсайды. Өйткені Әуезов мұражайының қорында әр түрлі баспасөз органдарынан мейрамдарға, мерейтойларға, мемлекеттік маңызы бар оқиғаларға қатысты мақала жазып беруді сұраған көптеген хаттар, жеделхаттар бар.