Ежет

Ежет , галотис (Halotіs) – алабұталар тұқымдасына жататын бір жылдық шөптесін өсімдіктер туысы. Қазақстанда Қызылқұмның тақырларында, тастақты төбелерде өсетін 1 түрі – түкті Е. (Н. pіlosa) бар. Биікт. 5 – 15 см, қалың түкті, негізгі сабағы жақсы жетілмейтін өсімдік. Жапырақтарының пішіні жіпше, етті, ұзындығы 1,5 – 4 см, диам. 1,5 мм-дей. Гүлдері қос жынысты, жеке-жеке жапырақ қолтығына орналасқан, қызғылт түсті. Аталығы 4, аналық мойны – екеу. Мамыр – шілде айларында гүлдеп, жемістенеді. Жемісі шырынды, тұқымының ұзындығы 3 мм-дей.