Ералхан Сайкенов

Сайкенов Ералхан (1938, Амангелді ауданы, Үрпек ауылы – 23.10.1989, Арқалық) – Амангелді ауданынан шыққан алғашқы жоғары білімді зоотехник, КСРО спорт шебері. Алматы зоотехникалық-малдәрігерлік институтын бітірген. Еңбек жолын «Сарыторғай» жылқы зауытында зоотехник болып бастап, бас зоотехник қызметін атқарған. Кейін арқалық ауданы «Аңғар» кеңшарында бас зоотехник болып, Амантоғай, Амангелді ауданында дайындық бөлімінде жауапты қызметтер атқарды. Сайкенов Ералхан Мектепте оқып жүрген кезінде-ақ қазақша күреспен айналысып, оқушылардың ауд., обл. жарыстарында жүлде алып жүрді. 1960 жылы студенттердің Мәскеуде өткен бүкілодақтық спартакиадасында 78 кг салмақ категориясы бойынша бірінші орын алды. Бұдан кейін Орта Азия және Қазақстан студенттерінің аймақтық бәсекесінде чемпион атанды. Ол алғаш спорт шеберінің нормасын орындап, аудан жастары арасында күрес өнерінің өрістеуіне көшбасшы болды. Амангелді кентіндегі орталық спорт залына Сейкенов Ералхан есімі берілген.