Жадыра Есенқызы Таспамбетова

Жадыра Есенқызы Таспамбетова (30.03.1953, Қызылорда облысы, Шиелі ауданы, Иіркөл ауылдық округі, Ақтоған ауылы - 2010) - механизатор, Социалистік Еңбек Ері (1982).

Өмірбаяны

Еңбек жолын «Қызылту» ұжымшарында трактор, комбайн айдаудан бастады. Егіс басында байқаусызда комбайн бункерінің шнегіне аяғы ілініп, мүгедек болып қалды. Ауруханадан шыққан соң протез салынған аяғымен қайтадан трактор руліне отырды.

1978 жылдан бастап жүгері звеносын басқарды. Өздері жер айдайды, тегістейді, егеді, жинайды. Ол тағы жүгері комбайнын жүргізді. Жолдасы өмір бақи бульдозерист болып жұмыс істеді. Ж.Таспамбетова құрған жүгері звеносында 13 адам бар еді. Бұл құрған жүгері звеносы 150 га жерге югославиялық «ВИР-156» сортты жүгері егумен айналысты.

Жадыра Таспамбетова «Қызылту» және «Телікөл» кеңшарларында еңбек еткен жылдары үнемі алғы шепте болды.

Қазақстан Ленин комсомолы сыйлығының лауреаты атанды.

Қазақ КСР Жоғары Кеңесінің депутаты болды. Еңбек Қызыл Ту орденімен марапатталды. 2001 жылы Астана қаласында Тәуелсіздіктің 10 жылдығы мерекесіне қатысып, Президентіміз Н.Назарбаевтың Жарлығымен «Тәуелсіздіктің 10 жылдығы» медалімен наградталды. 2007 жылы «Астананың 10 жылдығы» мерекесіне қатысып, «Астана-10» медалімен наградталды. Облыстың әлеуметтік-экономикалық дамуына қосқан үлесі үшін оған «Шиелі ауданының құрметті азаматы» атағы берілді. 2009 жылы «Қызылорда облысына - 70 жыл» медалімен марапатталды.

Ол туралы М. Күлімбетов «Жүрегінің жолдамасы» атты кітабын жазды, белгілі ақын Х.Ерғалиев «Қыз-қисса» дастанын жазса, ақындар Д.Байдрахманұлы мен Қ.Уәлішер де поэмаларын Жадыра Таспамбетоваға арнады.

Жадыраның жазған күнделігі бойынша Мұрат Күлімбетовтың редакторлық етуімен «Жүрегімнің жолдамасы» кітабы жарыққа шықты.

Сыртық сілтемелер

• ТАСПАМБЕТОВА ЖАДЫРА
• 67 ТАСПАМБЕТОВА ЖАДЫРА