Жануарлар жүнінің табиғи бояуы

Жануарлар жүнінің табиғи бояуы - жүннің табиғи бояуы (жануардың түсі, реңі) оның жүн талшықтарында бояғыш заттардың – табиғи пигментердің, эумеланин мен феомеланиннің болуына байланысты. Бұл пигменттер күн сәулесі спектрінің көк-жасыл бөлігін сары-қызыл бөлігіне қарағанда қарқындырақ сіңіреді. Егер жүн талшықтарында эумаланин мөлшері көп болса, ол қара болып көрінеді. Эумаланин мөлшері азырақ болса, ол қоңыр түстің әр түрлі реңдеріне боялады. Егер жүн талшықтарының негізгі пигменті феомаланин болса, ол жирен-қызыл түсті болып көрінеді, кейде осы түстерді эумаланин құрамды қоңыр түстің кейбір реңдерінен айыру қиынға түседі. Жүннің түсі тек пигменттердің болуымен ғана анықталмайды, сонымен қатар түс пигменттің түріне, мөлшеріне, әр бір жеке жүн талшығының бойында таралуына (пигмент бір жерге ошақтанып жинақталады да, олардың арасында бос түссіз аймақтар қалады немесе ұсақ дәндер түрінде бүкіл талшық бойына бірдей таралады) және жүн жамылғысында таралу ерекшелігіне (қара және ақ талшықтар аралас) тәуелді. Пигмент мөлшері 0,4-0,8 мкм болатын қатты (берік) ұсақ бөлшектер түрінде арнайы маманданған жасушалар- меланоциттерде түзіледі. Меланоциттер шаш (жүн талшығы) фолликулының пиязшықтарында орналасады.