Желіннің шығару өзектер жүйесі

Желіннің шығару өзектер жүйесі (выводящая система вымени) — бөлінген сүттің желіннен шығарылуы мен жиналуын қамтамасыз ететін желін өзектерінің жиынтығы. Без бөлікшелерінен сүттің бөлініп шығарылып, сүт қойнауында жиналуын қамтамасыз ететін өзектертер

1. соңғы (терминальды) немесе альвеолалы сүт түтікшелері,
2. жинағыш (бөлікшелер ішіндегі) өзекшелер,
3. әртүрлі арналы бөлікшелераралық сүт өзектері,
4. сүт қойнауының өзектері жатады. Жиналған сүт — сүт қойнауынан сүт емшегі арқылы сыртқа шығарылады.

Соңғы сүт түтікшелерінің арнасы сүт альвеоласына қарағанда әлдеқайда тар болады (орташа диаметрі 5-15 мкм). Олардың қабырғалары да сүт альвеолары сияқты екі қабаттан: ішкі — бірқабатты текше (куб) тәрізді эпителий қабатынан және сыртқы - миоэпителий қабатынан тұрады. Жинағыш өзекшелердің қабырғасы да екі қабаттан құралған: ішкі — бірқабатты призма тәрізді эпителий қабатынан және ұзынынан жатқан миоэпителий қабатынан. Бөлікшелераралық және қойнау өзектерінің ішкі қабатын екіқабатты эпителий астарлайды. Эпителий қабатының астында борпылдақ дәнекер ұлпалық (өзіндік тақташа) қабат орналасады. Бұл қабатта өзектерді сақина тәрізді орап жатқан бірыңғай салалы ет ұлпасының миоциттері мен эластин талшықтары кездеседі. Қойнау өзектері арналарының бөлінген сүттің жиналуына бейімделген кең қуыстары болады. Сүт желін емшегінің үрпісі арқылы сыртқа шығады.