Жемір жасушалар

Жемір жасушалар (макрофаги); (гр. macrophagi makros — үлкен, ірі; phagein — обу, жеміру, жеу) — организмге түскен бактериялар мен басқа протеиндік бөгде заттарды қармап, оларды қорытуға қабілетті жасушалар. Жемір жасушаларға макрофагиялық жүйе жасушалары (мононуклеарлы фагоциттер жүйесі), моноцит туындылары (гистиоциттер, бауыр, қан жасаушы мүшелер, өкпе, сірлі қуыс, тері, буын макрофагтары, остеокластар, микроглия т.б. жасушалар) жатады.

Жемір жасушалардың орташа мөлшері 10-15 мкм, ядросының пішіні дөңгелек, сопақ немесе бұршақ тәрізді, цитоплазмасы базофилді көкшіл түске боялады. Жемір жасушалар дәнекер ұлпасының жасушааралық заттарына биологиялық белсенді заттарды және ферменттерді бөліп шығарады. Жемір жасушалар сүйектің қызыл кемігіндегі діңгекті жасушалардан және олардан туындайтын моноциттерден (қан жасушасы) дамиды. Бұл организмде фагоцитоз процесін іс жүзіне асырумен қатар, организмдегі иммунологиялық реакцияларға қатысып, Т және В лимфоциттердің эффекторлық қызметін, сондай-ақ фибробласттардың белсенділігін арттырады.