Жетісу жұмысшы

Жетісу жұмысшы, шаруа және солдат депутаттарының кеңесі - Жетісуда Кеңес өкіметін орнатуға басшылық жасаған алғашқы билік органы. 1918 ж. наурыздың 2-сінен 3-іне қараған түнде ол ұйымдастырған қарулы көтерілістің нәтижесінде Верныйда Кеңес өкіметі орнады. 1918 ж. 14 сәуірде Жетісу Кеңестерінің біріккен мәжілісінде Кеңестің атқару комитеті сайланды. РК(б)П Верный ұйымының ұсынысы бойынша оның төрағалығына П.Виноградов, орынбасарлығына С.Журавлев, мүшелігіне Т.Өтепов, П.Гречко, т.б. сайланды. Кеңес аткомының жанынан жер, финанс, азық-түлік, еңбек, заң, халық ағарту, денсаулық сақтау, әскери және ұлт істері жөніндегі комиссариаттар (кейін бөлім деп аталады) құрылды. Олар Жетісуда Кеңес өкіметін нығайтуға тікелей басшынық жасап, 1918 ж. жазында Верный уезінде 49, Жаркент уезінде 36, Қапал уезінде 40, Лепсі уезінде 60 ауылдық, селолық және қыстақтық Кеңес құрды. О.Жандосов, Т.Бокин, Ю.Бабаев, Розыбакиев, С.Журавлев, П.Гречко бұл жұмысқа белсене араласты. Жетісу Кеңесі бар күш-жігерін Азамат соғысын жеңіспен аяқтауға жұмсап, Қызыл Армия бөлімдерін кару-жарақ, азық-түлікпен қамтамасыз ету, көшпелі шаруаларды отырықшылыққа айналдыру, мал шаруашылығын өркендету, алғашкы кеңшар жұмыстарын жақсарту, байлар мен кулактарды тежеу мәселелеріне көңіл бөлді.