Жұрым

Жұрым, жұрым берсін. Бұл тұрақты тіркес көбіне қарттардың жастарға арнап айтқан жақсы тілектерінде жиі қолданылады. Ертедегі түркі тайпаларының қолданылуында жеке мағынаға ие болған және жиі айтылған кейбір сөздер кейінірек араб, иран сөздерінің тілімізге сыналап кіріп, қалыптасуынан ығысып шығып, тек тұрақты тіркестерде ғана сақталғандығы байқалады. Осындай сөздің бірі — «жұрым». Алтай тілінің солтүстік диалектісінің бірінде, дәлірек айтсақ, куманды-кижи тілінде «дьүрүм» немесе «чүрим» тұлғасындағы сөз қазіргі тіліміздегі «өмір», «тіршілік» мағынасында қолданылады. Бұл жерде «жұрым» сөзінің мағынасын түсіндіруде біз қолданып отырған «өмір»— араб тілінен екендігі әркімге де түсінікті. Сейтіп, «жұрым берсін» дегеніміз «өмір берсін» дегенмен барабар.