Жәкен Жұмағалиұлы Даненов

Жәкен Жұмағалиұлы Даненов

1949 жылы 1 ақпанда Қостанай облысының Бурабай ауылында туған. Қазақ.

Әкесі - Даненов Жұмағали Сәдуақасұлы, марқұм, ҚазКСР Еңбек сіңірген мұғалімі. Анасы - Даненова Биғайша Естайқызы, марқұм, ұстаз болып қызмет істеген.

Алматы театр-көркемсурет училищесін (1967) график мамандығы бойынша, Бүкілодақтық мемлекеттік кинематография институтының көркемсурет факультетін (1973) қоюшы-суретші мамандығы бойынша бітірген.

«Қадырдың бақыты» (1977), «Алпамыс батыр» (1986), «Бұлбұл» (1986), «Аң аулау» (1989), «Айдаһар аралы» (1998),«Дүние кезек» (2002), «Ақсақ құлан» (2003), «Қасқырдың қалыңдығы» (2005) анимациялық фильмдерінің - Ғ.А.Қыстауовтың серіктес авторлығында - авторларының бірі.«Орталық Азияның ең үздік фильмдері» бағдарламасына қатысқан (Токио қаласы, Киото, 1995).

Халықаралық «Анкара» кинофестивалінде (1994), Халықаралық «Пусан-2000» кинофестивалінде (Оңтүстік Корея) арнайы көрсетілімі болған.

Қазақ және орыс тілдерін біледі.

1972 жылдан бөрі - «Қазақфильм» киностудиясында анимацияның режиссері және қоюшы-суретшісі (қазіргі - Ш.Айманов атындағы «Қазақфильм» АҚ).ҚР Кинематографистер одағының, Суретшілер одағының мүшесі.

Украинада өткен анимациялық фильмдердің ашық фестивалі қазылар алқасының Арнайы сыйлығының және балалар қазылар алқасының Бас сыйлығының (Львов қаласы,1977), XIX Бүкілодақтық кинофестивальдың Бірінші сыйлығының және Алтын дипломының (Алматы қаласы, 1986), Украинадағы анимациялық фильмдердің ашық фестивалі қазылар алқасының Арнайы сыйлығының (Тернополь қаласы, 1986), Азия, Африка және Латын Америкасы елдерінің Халықаралық кинофестивалі дипломының (Ташкент қаласы, 1986), славяндық және православиялық халықтардың II Халықаралық «Алтын витязь» кинофестивалінің «Қола витязь» сыйлығының және «Славян мәдениетіне сіңір- ген үлкен үлесі үшін» дипломының (Нови-Сад қаласы, Сербия, 1993), Халықаралық «Хиросима» кинофестивалі дипломдарының (1998, 2002), I Халықаралық «Еуразия» кинофестивалі Гран-приінің (Алматы қаласы, 1998), I Ұлттық «Шәкен жұлдыздары» кинофестивалінің «Шәкен жұлдызы» сыйлығының (Алматы қаласы, 2003), ең үздік «Астана-Бәйтерек» анимациялық фильмі сыйлығының (Астана қаласы, 2005) иегері.Қазақстан Ленин комсомолының лауреаты (1978). Қазақстанның Еңбек сіңірген қайраткері (2000).

Үйленген. Жұбайы - Төрежанова Күлзия Нүкенқызы, «ЕрТөстік» балалар бақшасының меңгерушісі. Қыздары - Әлия (1974 жылы туған), Жұлдыз (1989 жылы туған); ұлы - Асан (1976 жылы туған).