Зениттік артиллерия

Уикипедия — ашық энциклопедиясынан алынған мәлімет
Jump to navigation Jump to search
A.
Зениттік артиллерия.

Зениттік артиллерия[1]әуе нысаналарын жоюға арналған артиллерия. Әуе шабуылына қарсы қорғаныс әскерлерінің, Құрлықтағы әскерлердің және Әскери-теңіз әскерлерінің (Әскери-теңіз күштерінің) қару-жарақтары құрамына кіреді. Зениттік артиллерия қозғалу мүмкіндігіне қарай тіркелмелі, өздігінен жүретін, тұрғылықты, ал калибрі бойынша кіші калибрлі (20 – 60 мм), орта калибрлі (60 – 100 мм) және үлкен калибрлі (100 мм-ден жоғары) болып бөлінеді. Оның қосалқы жабдықтарына, сондай-ақ, зениттік-артиллерия аспаптар да жатады. Зениттік артиллерияның ең көп тараған үлгілері – калибрі 57, 100, 130 мм болатын зениттік зеңбіректер. Зениттік артиллерияны жер үстіндегі (су бетіндегі) нысаналарды ату үшін де қолдануға болады. Бір немесе бірнеше зеңбірек пен әр түрлі техикалық құралдар жиынтығын – зениттік артиллериялық кешен деп атайды. Ол зениттік зеңбіректер, көздеу атуды басқару құралы немесе есептеу құрылғысы, қашықтық өлшеуіш, синхронды хабарлау және іздеу жүйесі, электр агрегаттары, құрамдас бөліктерден тұрады.

Қазіргі кезде[өңдеу]

Бұл құрамдас бөліктер бір қондырғыда (өздігінен жүретін зеңбірек-қондырғы), сондай-ақ, жеке-жеке де орналасады. Жеке-жеке орналасқан жағдайда зеңбіректің көздеу, атуды басқару құралы, жабдықтау агрегаттары жеке көлікте орналасады және олардың барлығы бірігіп радиоқұралдар кешенін құрайды. Ату кезінде координат нүктелері үздіксіз анықталып тұрады. Тікелей көздеп ату және бөгей ату әдістері қолданылады. Ату кезекпен (дүркін-дүркін немесе үздіксіз атыс) жүргізілді. Зениттік зеңбіректерден басқа зениттік пулемет қондырғылары да болады. Ол – арнайы станокке орнатылған автоматты қару. 2000 м-ге дейінгі биіктіктегі әуе нысандарын ату үшін қолданылады, бір немесе бірнеше (2 – 4) пулеметтерден тұрады. Зениттік пулемет қондырғыларымен жаяу әскер, танк, БТР экипаждары, кіші кемелер мен зениттік бөлімшелер қаруланады. Олар өздігінен жүретін, тіркемелі, жылжымалы (танк, кеме, БТР-де) және тұрғылықты болып бөлінеді.[2]

Дереккөздер[өңдеу]

  1. Қазақ тілі терминдерінің салалық ғылыми түсіндірме сөздігі: Әскери іс. Алматы: «Мектеп» ААҚ , 2001 жыл
  2. "Қазақ Энциклопедиясы",4 том 3 бөлім