Иірмелі тербеліс

Иірмелі тербеліс – серпінді жүйеде (мысалы, конструкциялар мен машиналарда) пайда болатын тербелістердің бір түрі; тербеліс процесі кезінде серпінді жүйенің кейбір бөліктері бұралу деформациясына ұшырайды. Бір жақ ұшы басқа бір шомбал дискіге бекітілген серпінді стержень түріндегі иірілмелі маятниктің тербелісі де иірмелі тербеліске жатады. Конструкцияларда иірмелі тербеліс қажетсіз құбылыстарды (мысалы, двигатель бөліктернің резонанс салдарынан қирауы) да туғызады. Бұл әсіресе іштен жанатын поршеньді двигательердің (авиациядағы, кемедегі т.б.) иінді білігінде көбірек кездеседі. Сондықтан да күрделі жүйе (авиациялық конструкцияларда т.б.) бөліктерінің меншікті тербеліс жиілігі құраушы моменттердегі негізгі жиіліктердің бірімен сәйкес келмеу жағдайы алдын ала ескеріледі.