Картодиаграмма

Картодиаграмма – карта бетіндегі аумақтық бөліктің белгілі бір статистикалық көрсеткішінің жалпы жиынтығын (кейде құрылымы мен динамикасын) графикалық кескіндеме (диаграмма) көмегімен көрсететін карта. Мысалы, мемлекет, облыс, аудан бойынша халықтың саны және құрамы, өнеркәсіптің жалпы өнімі және құрамы, белгілі бір мерзім ішінде өсуі (төмендеуі), тағы басқа көрсетіледі. Мұндай Картодиаграмманы жасау үшін әр аумақтық бірлікке осы аумаққа қатысты көрсеткіш диаграммасын орналастырады. Картодиаграмма тұрғызу үшін кейде тұрақты аумақтық бөлініс торы да пайдаланылады. Картодиаграммада салыстырмалы мөлшерді де, абсолютті мөлшерді де беруге болады. Картодиаграммада, негізінен, сызықтық диаграмма (бағаналар, жолақтар, тағы басқа) пайдаланылады. Олардың ұзындығы көрсетілетін шамаға пропорционал болады. Сондай-ақ, аудандық диаграммалар (квадраттар, шеңберлер, үшбұрыштар, тағы басқа) мен көлемдік диаграммалар (кубтар, шарлар, тағы басқа) қолданылады.