Кербез қыз

Кербез қыз — халық күйі. Нотаға түсірген Мәлгеждар Әубәкіров.

Күйдің аңызы

Бір байдың үш ұлы, бір қызы болады. Байдың балалары келбетті, сұлу болады. Бай шалқыған дәулеттің арқасында сұлу атанған үш ұлына еліндегі ең сұлу қыздарды таңдап қосады. Қора-қора қалың мал беріп, ел таңданарлық той жасайды. Әкесінің ашық қолдығына риза болған балалары да, келіндері де алдынан қия өтпейді, төбесіне хан көтеріп, құрмет көрсетеді. Байдың кенже қызы да көрікті екен. Ең айыбы — қыз сылтыма болады. Бірақ ол өзінің сылтып басатынына қарамай, әкесінің мол дәулетіне арқаланып жігіт таңдайды. Ғашық болған талай жігітке теңім емессің деп жауап береді. Сөйтіп жүргенде жасы егделеп, енді жігіт таңдау былай тұрсын, жігіттің сөз салуына зар бола бастайды. Бала жігіт күнінде осы қызға сөйлесіп, одан теңім емессің деген жауап естіген, ел ішінен өмірлік жар боларлық сұлуға таңдап қосылған бір жігіт қыз егделеп қалған кезде байдың ауылына келеді. Келсе баяғыдай күйеуге шығып кетті ғой деп жүрген қыз әлі орнынша екен. "Япыр-ау, теңім емессің деп, маңына жолатпап еді, менен қай жері артық. Менің бұдан қай жерім кем",- деп толғанады. Содан бері "Кербез қыз" күйі тарап кетеді екен.