Кешкі мектеп

Кешкі мектеп– түрлі себеппен орта мектепті дер кезінде бітіре алмаған адамдарға өндірістен қол үзбестен жалпы орта білім алуға мүмкіндік беретін оқу орны. Мектеп өзінің қызметінде жалпы орта білім беретін мектеп жарғысы мен кешкі (ауысымдық) жалпы білім беретін мектеп туралы ережені басшылыққа алып отырады. Кешкі мектеп құрамында 9 – 11-сыныптар болды, оқушылар қатары толыққан жағдайда 5 – 8-сыныптар ашылды. Оқу жылының ұзақтығы – 36 оқу аптасы, бірінші жарты жылда – 17 апта, екінші жарты жылда – 19 апта болды. Оқу жылы 1 қыркүйекте басталып, 25 мамырда аяқталатын. Оқуға қабылдану және оқушыларға берілетін қосымша жеңілдіктер арнайы белгіленген ережеге сай іске асырылды.