Кино үйі

“Кино үйі” – кино өнері қайраткерлерінің Алматыдағы шығармашылық үйі. Сценарийші, жазушы, режиссер, оператор, суретші, композитор, актер, кино зерттеуші, кино сүйер жұртшылық, т.б. әр түрлі тақырыптық кештерде осында бас қосып тұрады. 1971 ж. ашылды. “Кино үйінде” Қазақстан кинематографтарының съездері, кино мәселелері жөніндегі халықаралық симпозиумдар, Қазақстан Кинематографияшылар одағының, сондай-ақ, басқа да шығармашылық одақтарының бірлескен пленумдары өтіп тұрды. “Кино үйінде” болған осындай жиындардың ішінде 6-Бүкілодақтық кинофестивальді (1973), Азия, Африка және Латын Америкасы елдеріндегі мультипликацияның даму проблемаларына арналған халықаралық симпозиумды (1976), киноның қоршаған ортаны сақтаудағы рөліне арналған халықаралық симпозиумды (1982), Халықар. “Еуразия-98” кинофестивалін, т.б. атап өтуге болады. “Кино үйінде” жаңа шыққан қазақ фильмдерінің премьераларын, сондай-ақ, ең үздік фильмдерін көрсетіп отыру дәстүрге айналған. Қазақстан Кинематографияшылар одағының кинорежиссура, операторлық шеберлік, кино суретшілері, кино сыны, кинотану, деректі фильмдер, мультипликация, дубляж және жас кинематографияшылар секциялары жұмыс істеді. “Кино үйінің” фойесінде Қазақстан суретшілерінің, сәулетшілерінің, мүсіншілерінің көрмелері жиі ұйымдастырылады.