Клептократия

Клептократия (гр. κλέπτειν «ұрлау» + κράτος «мемлекет, билік») — билікті қолданып, мемлекеттік қаржыны ұрлау арқылы өзінің байлығын және саяси ықпалын үлкейтетін, алаяқтармен бақыланатын, кейде өз халқына әділетті қызметін көрсетпейтін үкімет. Клептократия көбіне автократиялық, олигархиялық немесе диктаторлық режимдерде кездеседі, алайда демократиялық елдерде де болуы мүмкін. Клептократияға жемқорлық және лоббизм тән.

Ерекшеліктері

Клептократиялық режимдерде жоғары лауазымды тұлғалар мен олардың айналасындағы топтар мемлекеттік қаржыны, табиғи ресурстарды немесе шетелдік көмекті жеке мақсатта пайдаланады. Бұл ретте экономикалық және саяси жүйе элитаның байлығын арттыруға бағытталған. Қазіргі заманда көптеген дамушы елдерде кездеседі.

Салдары

Клептократияның салдары саясат және экономика салалары бойынша халыққа үлкен зиян келтіреді, шетелдік инвестицияларға жол бермейді, елдегі сауда-саттықты әлсіретеді, тұрғындардың өмір сүру сапасын төмендетеді, себебі клептократтардың көбісі ақшаны қоғам үшін қажетті мектеп, аурухана, жол, парк және т.б. жобаларға бөлінген қаржыдан алады.