Көмкере тігу машинасы

Көмкере тігу машинасы – матаның (кездеменің) киім пішу кезінде қиылған жиектері сетінемеу үшін оны көмкеріп тігуге арналған тігін машинасы. Көмкере тігу машинасында, көбінесе, бір, екі, не үш жіпті тізбектей шалып тігу әдісі қолданылады. Бұл машиналар бір принципте жұмыс істейді. Екі не үш жіпті Көмкере тігу машинасының жұмыстық тетігінің сұлбасы суретте көрсетілген. Ине (1) кездемені (матаны) түйрейді де тік жүретін а тұзақ жіпті іліп өтеді. Сол жақтағы тұзақтағыш (3) тігіске көлденең бағытта оңға қарай қозғалған кезде, а тік тұзағы сол жағынан келе жатқан ә жіпті іліп алады да, оны кездеменің жиегіне қарай тартады. Осы кезде бұған оң жақтағы тұзақтағыш (2) арқылы б жібі ілініп, кездеменің үстіне шығарылады да, иненің астына келіп тоқтайды. Келесі тігісте пайда болатын жаңа тұзақ инемен б оң жақтағы тұзақтағыштан келетін жіп ілініп алынып, кездемеден өткізіледі. Осылайша тігіс қайталанып, матаның қиылған жиегі сетінемейтін болып жіппен көмкеріледі.