Лездеме

Лездеме (Летучка) — офицерлік құрамды тактика және оперативтік мәнер бойынша дайындау түрі. Сыныпта картамен немесе жергілікті жерде (жергілікті жер макетінде) әскерлерді (күштерді) басқару, жағдайды өздігінен және тез талдауға жаттықтыру және оны жетілдіру, тез шешім қабылдау, бағыныштыларға жауынгерлік тапсырма беру, сондай-ақ офицерлердің бойында адамгершілік, жауынгерлік және психологиялық қасиеттерін қалыптастыру мәселелері бойынша оқушылардың білімі мен дағдыларын тексеру максатында өтеді. Лездеме басшылық, штабтық, тылдық және арнайы болады. Әр Лездемеде 1-2 мәселе қаралады. Басшылық Лездемеде оқушылар командир (қолбасшы) дұрыс деп тапқан шешімді қабылдайды; штабтық Лездемеде оперативтік-тактикалық есеп жүргізеді және ұрыс құжаттарын дайындайды; тылдық Лездемеде ұрысты тылдық жабдықтау бойынша шешім қабылдайды; арнайы Лездемеде өз әскерлерін (арнайы әскерлерді) операциялар мен ұрыстарда пайдалану мөселелерін дайындайды. Лездемені дайындау әдетте, тақырыпты оқыту мақсаттарын, оқыту мәселелерін, оқушы құрамын, өту уақытын және сабақтың материалдық жабдығын анықтаудан басталады. Лездемені өткізу жоспары жасалады. Оған: бастапқы деректер, тактикалық (оперативтік) мәні, сабақ барысында жетекшінің өткізетін шаралары, жағдай деректері кіреді. Жергілікті жерде лездемені өткізу топографиялық бағдарлаудан басталады. Сонан соң қалыптасқан жағдай хабарланып, оқушылардың оны бағдарлауына, шешім қабылдауына және жұмысты белгілі бір лауазымдық тұлға ретінде атқаруына уақыт беріледі. Осыдан кейін жетекші оқушыларының шешімін тыңдайды. Лездемені карта бойынша өткізгенде оқушыларға жазбаша немесе ауызша тапсырма беріледі. Лездемені жетекші оқушы жауабын тыңдап, жұмысын тексергеннен кейін талдайды. Лездеменің ұзақтығы оның мақсатына, оқыту мәселелерінің қиындығына байланысты.