Лек жолы

Лек жолы - әскерлердің жолдардан тыс қозғалысы үшін таңдалған және дайындалған жергілікті жердің алқабы. Лек жолы жолдар жетпеген жағдайда немесе оларды пайдалануға болмайтын жағдайда салынады. Лек жолы арнайы доңғалақты және шынжыр табанды машиналар үшін немесе аралас лек үшін жабдықталады. Жүріп өтетін жолақтың ені доңғалақты машиналар үшін — 3,5 м-ден, шынжыр табанды машиналар үшін — 4,5 м-ден, аралас лек үшін 8 м-ден кем болмауы керек. Лек жолы әскер күшімен инженерлік техника мен аспалы құрал-жабдықтары бар машиналарды пайдалану арқылы дайындалады. Ең қиын жұмыстарды әскердің инженерлік бөлімшелері атқарады. Қыста лек жолын салу үшін танкілер мен қар тазалайтын машиналар, грейдерлер, бульдозерлер және қарапайым қар тазалайтын құралдар пайдаланылады. Жергілікті жерді барлау барысында лек жолының бағыты таңдалып, белгілермен, жол сілтегіштермен белгіленеді; өтуге болмайтын бөгеттер мен кедергілер, қираған аймақтар мен зақымданған бөлімдер анықталады; жасалатын жұмыстардың орны, түрлері мен көлемі анықталады. Улы заттармен зақымданған аймақтардағы өту жолдарын химиялық әскер бөлімшелері газсыздандырады. Tap кедергілерден өткенде (өзендер, жыралар, орлар) өткелдер жабдықталады немесе жүріп өту жолдары жасалады. Ол үшін топырақ төселіп, жол құбырлары мен жиналмалы көпірлер пайдаланылады. Лек жолындағы көпірлер 25 тоннаға дейін доңғалақты және 40-60 тоннаға дейін шынжыр табанды машина жүктерін көтере алады. Қар көп түсетін аймақтарда қардан қорғанатын қалқандар, қоршаулар, қабырғалар жасалынады. Лек жолы жол сигналдары немесе жарық беретін белгілермен белгіленеді.