Линдеман барылдауық қоңызы

Линдеман барылдауық қоңызы (лат. Carabus lindemanni) – барылдауық қоңыздар тұқымдасының биологиялық түрі. Таралу аймағы тез қысқарып бара жатқан түр. Туыстың филогенезін анықтауға ыңғайлы, себебі туыс жүйесінде жеке бөлініп тұр. Іле Алатауының орталық бөлігі тау етегі, Шамалған мен Түрген өзендері аралығының жергілікті түрі. Теңіз деңгейінен 800-1000 м биіктіктегі тау етегінің ашық далалы жерлерінде тіршілік етеді.Көктемгі эфемер. Қоңыздар сәуір және мамырдың бірінші жартысында белсенді. Оның тіршілік ету ортасының бүлінуіне адамның шаруашылық әрекеттері: құрғақ өсімдіктерді өртеу, улы химикаттармен өңдеу, саяжай құрылыстары, жасанды ағаштар отырғызу кері әсер етеді. Семенов ызылдауық қоңызы сияқты, шаруашылық жұмыстары аз жүрген тау етегінің далалы бөліктерінде шағын қорықтар мен қорықшалар ұйымдастырып, онда саяжай құрылыстарын салуға, бақтар отырғызуға тиым салу керек.

Дереккөздер

«Ғажайып омыртқасыздар» Қазақстан Қызыл кітабы беттерінен И.Д.Митяев, Р.В.Ященко, В.А.Казенас Алматы 2005