Магний кентастары

Магний кентастары

Магний кентастары — магнийлі қосылыстардан құралған минералдық шикізат. Оның жер қыртысындағы орташа мөлшері 2,1%. Кейбір ультранегізді магмалық және карбонатты шөгінді жыныстарда 21 — 47%-дай MgO болады. Құрамына жүзден аса минерал кіреді. Мысалы,

• брусит Mg(OH)2 41,7% магнийді құрайды;
• магнезит MgСO₃ (28,8% Mg);
• доломит MgСO₃СаСО₃ (18,2% Mg);
• кизерит MgSO₄Н₂О (17,6% Mg);
• бишофит MgCІ₂6H₂O (12,0% Mg);
• лангбейнит 2MgSO₄К₂SO₄ (11,7% Mg);
• эпсомит MgSO₄7Н₂О (9,9% Mg);
• каинит MgSO₄КСІ3Н₂О (9,8% Mg);
• карналлит MgCl₂KCl6H₂O (8,8% Mg),
• астраханит MgSO₄Na₂SO₄4Н₂О (7,3% Mg);
• полигалит MgSO₄ 2СаSО₄К₂SО₄2Н₂О (4,2% Mg).

Магний кентастарының басты кен орындары магнезиялы калий тұзды қазбалары. Магнезиттің ірі кен орындары метаморфозды доломиттерде көп кездеседі. Магнезит отқа төзімді шикізат, магний металын алуға қолданылады. Калий-магнийлі тұздарды тыңайтқыш алу үшін өңдегенде шыққан қалдықтардан да магний алынады. Солтүстік Арал маңындағы Жақсықылыш, Жаманқылыш көлдерінде, Жамбыл облысындағы Тұзкөлде эпсомит, астраханит сияқты магнийлі тұздардың қабаттары ұшырасады. Маңғыстаудағы Қаракие]] ойысына Каспий теңізінен құйылған су буланғанда едәуір мөлшерде магнийлі тұздар тұнады. Шығыс Қазақстан, Қостанай, Қарағанды, Павлодар облыстарының ультранегізді талькты-карбонатты жыныстарында Магний кентастарының мөлшері мол.