Мұнайгаздылықты көлемдік-тектік тұрғыдан болжау әдісі

Мұнайгаздылықты көлемдік-тектік тұрғыдан болжау әдісі. Мұнай мен газ қалыптасуының мөлшерін алаптағы шөгінділер көлемімен және солардағы органикалық заттар мөлшерімен байланыстыратын, көмірсутектер қалыптасуының шөгіндену-жылыстау теориясына негізделген сол көмірсутектердің болжамдық қорын бағалау әдісі. Әдістің ең басты теориялық қағидасы төмендегі түсінікке саяды: көмірсутектердің құрамы мен мөлшері оларды қалыптастырған шашыранды органикалық заттардың тектік түріне, олардың диагенез сатысында өзгермеленуінің фациялық-геохимиялық жағдайына, шөгінділердің жер қойнауының әр түрлі деңгейлеріндегі катагендік өзгермеленуінің қарқындылығына, сол сияқты жатыннан жылыстаған көмірсутектердің онда сақталған көмірсутектер мөлшерінің қаншалық бөлігін құрайтындығына байланысты. Есептеулерді жүзеге асыру үшін таужыныстардағы түрлі шашыранды органикалық заттардың таралуы және массасы, жыныстардағы қалдық таушайыр тектестерінің үлес салмағы, алаптағы шөгінді қабаттардың палеотемпературасы мен палеотереңдіктері жайлы деректерді білу керек. Бұл әдісті көмірсутектердің қалыптасуы мен жинақталуы дербес өрбіген нысандарда ғана қолдану ұтымды. Қалыптасқан және жинауыштарға нақталған сұйық және газ түріндегі көмірсутектердің мөлшерін бұл әдіс көмегімен бағалау тым жақсы нәтижелер береді, бұл мөлшер мұнай мен газ қалыптасуының ең жоғарғы мүмкіндігін анықтайды.