Наренджестан

Уикипедия — ашық энциклопедиясынан алынған мәлімет
Навигацияға өту Іздеуге өту

Наренджестан — Қавам бағы Шираз қаласының ежелгі де әдемі бақтарының бірі болып табылады. Бұл бақ пен оның ғимараты Шираздағы Қаджар дәуірінің құнды ескерткіші болып саналады. Бақта апельсин ағаштары көп. Сондықтан ол Наренджестан - апельсин бағы деген атпен танымал. Әли Мұхаммадхан Қавам әл‑Мүлк бақ пен оның кешенін салуды бастаған. Х.қ.ж.с.б. 1300 жылы оның ұлы Мұхаммад Реза Қавам әл‑Мүлк бұл құрылысты аяқтады.

Бақтың негізгі қақпасы оңтүстікке қарайды. Қақпаның жоғары жағы кірпіш пен қызыл мәрмәр тастан жасалған тақташалармен өрнектелген. Бұл тақташаларда Құран аяттары жазылған. Қақпаның өзі ағаштан жасалған өрнектермен көмкерілген. Қақпа алдымен кіре беріс бөлмеге жол бастайды. Ол екі дәліз арқылы бақтың ауласымен жалғасып жатыр.

Наренджестан бағының солтүстік, оңтүстік және шығыс жағында ғимараттар салынған. Зандие дәуірінің сәулет стилімен салынған негізгі ғимарат бақтың солтүстік бөлігінде орналасқан. Онда екі қабат пен бір жертөле, екі жағында екі үлкен терасса бар. Бұл терассалар ғимараттың басқа бөліктеріне кіруге арналған. Терасса аула деңгейінен екі метр биіктікте салынған. Үлкен терассаның бағандары берік қалыптағы біртұтас мәрмәр тастан құйылған.

Наренджестан бағы 3500 шаршы метр жерді алып жатыр. Оның ғимараты шамамен 940 шаршы метр жерде бақтың солтүстік және оңтүстік жағында салынған. Бұл бақ х.ш.ж.с.б. 1353 (1974) жылы Иранның ұлттық ескерткіштерінің тізіміне алынған. Наренджестан бағындағы ғимарат айна және шыны сынықтарымен көмкеру, сурет салу, ағаштан ойылған өрнектермен көмкеру, мүсіндеу, алебастр жабыстыру және "мұқарнас", яғни күмбезді көмкеру тұрғысынан Шираздағы Қаджар дәуірінің ең әдемі ғимараттарының бірі болып табылады.

Наренджестан бағы 1345 жылы Шираз Университетінің қарамағына берілді. 1348-1358 жылдар аралығында бұл бақ атақты ирантанушы Артур Упхам Поптың басқаруындағы Азия институтының пайдалануына берілді. Ал 1378 (1999) жылы Шираз университетінің өнер және сәулет факультетінің қарауына өтті.