Нұр-Мүбарак Мысыр ислам мәдениеті университеті

Нұр-Мүбарак Египет Ислам Мәдениеті университеті
Университет атауы
Халықаралық атауы	الجامعة المصرية للثقافة الإسلامية نور مبارك‎
Жалпы сипаттамасы
Құрылған жылы	1993 жыл
Түрі	Жоғарғы оқу орны
Орналасуы
Орналасқан жері	Алматы қаласы, Қазақстан
Мекенжайы	Әл-Фараби көшесі 73, Алматы қаласы
Әкімшілік
Ректоры	Ахмед Хусейн Мухаммад Ибраһим
Негізгі көрсеткіштер
Студенттер	2993
Бакалавриат	2836
Магистратура	116
Докторантура	41
Сайты	https://www.nmu.edu.kz/

Университет тарихы

Нұр-Мүбарак Египет ислам мәдениеті университеті – Қазақстан мен Египет Араб республикасы арасындағы ортақ келісіммен іргетасы 1993 жылы қаланған жоғары білім ордасы. Қазақстан Республикасының тұңғыш президенті, Елбасы Нұрсұлтан Назарбаев 1993 жылы Мысыр еліне сапарында Египет Араб Республикасының Президетімен кездесуінде Қазақстанда ислами жоғары оқу орнын ашуға байланысты шешім қабылдады. Алматыда ислами ЖОО-ның кешенін салу үшін арнайы жер қарастырылып, 6 гектар жер бөлінді. Тәуелсіздіктің алғашқы кезеңіндегі бұл батыл шешім ел бірлігі мен болашағына жасалған нақты қадам болды. 1993 жылы 16 маусымда ҚР Президенті Н.Назарбаев пен ЕАР Уақыфтар министрі Мұхамед әл-Махжубтың университет қалашығының алғашқы тасын қалау рәсімі өтті.

Іргетасы қаланған бастама 2000 жылы, сол кездегі Қазақстан Мұсылмандары діни басқармасының төрағасы, Бас мүфти Әбсаттар қажы Дербісәлі мырзаның Египетке сапары барысында мемлекеттің ресми өкілдерімен келіссөздер жүргізу нәтижесінде қолға алынып, алғашқы студенттерді қабылдау шаралары жүргізіліп, бір жылдан кейін 1 қыркүйекте алғашқы дәріс беріле бастады.

Қос мемлекет басшыларының келісімі ҚР Парламентінде ратификацияланып, 2003 жылы 2 шілдеде Қазақстан Республикасының Президенті Н.Ә. Назарбаевтың жарғысымен күшіне енді.

Қамқорлар алқасымен университет жарғысы бекітіліп, ЖОО-ның басшылығын тағайындау бойынша ректор ЕАР-ның азаматы, проректор ҚР-ның азаматы болуы шарт етілді. Алқа келісімінің шешімімен университеттің алғашқы ректоры болып академик, профессор Махмұд Фахми Хижази, проректоры филология ғылымдарының докторы, профессор Шәмшәдин Тұрсынұлы Керім тағайындалды. ҚР-ның заңдары мен екі ел үкіметтерінің университетке байланысты келісімі және өз жарғысы негізінде жұмыс атқара бастаған университетке басшылық жасау мен оның екі жақты қызметін үйлестіруші Қамқорлар кеңесі құрылды.

Қамқорлар кеңесінің 2014 жылғы кезекті басқосуы шешімімен Нұр-Мүбарак университетінің ректорлығына Әл-Азһар университетінің профессоры, доктор Жуда Абдулғани Басюни тағайындалды. Докторлық диссертацияны Ханафи фиқһы бойынша қорғаған Ж.А.Басюни Әл-Азһардың "Шариғат және заң" факультетіндегі Фиқһ кафедрасының меңгерушісі және факультет деканы қызметтерін атқарған. Шариғат саласы ғалымының есімі өз елінде ғана емес, халықаралық деңгейдегі ислами ғылым орталарына танымал. Қамқорлар кеңесі Университеттің алғашқы құрылған сәтінен бастап, оқу орнының базасының күшейіп мемлекеттік лицензия алуы, исламтану мамандығының «5В050600–Исламтану» шифрымен мемлекеттік классификатор тізіміне еніп, грант бөліне бастауы, бакалавриатпен қатар магистратура, докторантура бөлімдерінің ашылып, мемлекеттік грант белгіленуі, ғылыми-зерттеу орталығын ұйымдастырудағы доктор, профессор Шәмшәдин Тұрсынұлы Керім мырзаның біліктілігін бағалай отырып, проректорлық қызметке үшінші мәрте қайта тағайындады.

Қамқорлар кеңесі

Қамқорлар кеңесі – екі елдің лауазымды тұлғаларынан құрылған университеттің ең жоғарғы басқару органы.

ҚР тарапынан:

• ҚР Мәдениет және ақпарат министрі – тең төраға;
• ҚР Ғылым және жоғары білім министрі – мүше;
• ҚМДБ-ның төрағасы, Бас мүфти – мүше;
• Алматы қаласының әкімі – мүше;
• ҚР Сыртқы істер Вице-министрі – мүше;
• ҚР-ның ЕАР-дағы Төтенше және өкілетті елшісі – мүше;
• ҚР Мәдениет және ақпарат министрлігі Дін істері комитетінің төрағасы – мүше;
• Әл-Фараби атындағы ҚазҰУ ректоры – мүше;
• Абылайхан атындағы Халықаралық қатынастар және әлем тілдері университетінің ректоры – мүше;

ЕАР тарапынан:

• ЕАР-дың Уақыфтар министрі – тең төраға;
• ЕАР-дың мүфтиі – мүше;
• Әл-Әзһар университетінің ректоры – мүше;
• Әл-Әзһар университетінің өкілі – мүше;
• Каир университетінің ректоры – мүше;
• ЕАР- дың ҚР-дағы Төтенше және өкілетті елшісі – мүше;
• ЕАР Уақыфтар министрінің қарауына орай үш көрнекті қоғам қайраткерлері – мүшелер.

Университет басшылығы

Ректор – профессор, доктор Ахмед Хусейн Мухаммад Ибраһим.

Аты-жөні: Ахмед Хусейн Мухаммад Ибрахим

Лауазымы мен жұмысы: Нұр-Мүбарак Египет ислам мәдениеті университетінің ректоры,  Алматы, Қазақстан.

Тәжірибесі мен қызметі:

• 1988 ж. Дағуат факультеті Діндер және мәзһабтар кафедрасының қызметкері;
• 1994 ж. Дағуат факультеті Діндер және мәзһабтар кафедрасының ассистенті;
• 1998 ж. Дағуат факультеті Діндер және мәзһабтар кафедрасының оқытушысы;
• 2003 ж. Дағуат факультеті Діндер және мәзһабтар кафедрасының доценті;
• 2011 ж. Дағуат факультеті Діндер және мәзһабтар кафедрасының профессоры;
• 2001-2009 жж. Сауд Арабия патшалығы Малик Халид университеті, Шариғат және дін негіздері факультетінің доценті;
• 2018-2022 жж. Әл-Әзһар университеті, Дағуат факультеті деканы;
• Әл-Азһар университетінің қауымдастырылған профессорлары мен профессорларының қызметін жоғарылату жөніндегі тұрақты ғылыми комитеттің мүшесі;
• Замалек қаласындағы Жоғары Ислам зерттеулері институтының комиссия мүшесі;
• Мысыр Уақыфтар министрлігі жанындағы мешіттердің сапасын бағалау комитетінің мүшесі;
• Бүкіл ислам әлеміндегі имамдар мен уағызшыларды дайындайтын Әл-Азһар академиясының лекторы;
• Халықаралық Ауқоф академиясының лекторы;
• Каирдегі әл-Азһар түлектерінің халықаралық ұйымының оқытушысы;
• Жаңа имамдарды даярлау және біліктілігін арттырудың негізгі бағдарламалары бойынша оқытушы;
• Мысыр Уақыфтар министрлігіне қарасты Ислам мәдениеті орталығының деканы (Байн әл-Сарайет);
• Уақыптар министрлігінің мәдени орталықтарында оқытушы;
•  Әз-Әзһар мешіті дәрісханасының лекторы.
• 18-ге жуық ғылыми еңбектер авторы, 91-ге жуық докторлық және магистрлік диссертацияларға жетекшілік етіп, қорғауға қатысқан.

Проректор – исламтанушы, теолог, PhD доктор Оңғар Ершат Ағыбайұлы

Аты-жөні: Оңғар Ершат Ағыбайұлы Лауазымы мен жұмысы: Нұр-Мүбарак Египет ислам мәдениеті университетінің проректоры,  Алматы, Қазақстан.

Тәжірибесі мен қызметі:

• 2007-2009 жж – Қазақстан мұсылмандары діни басқармасында маман, бөлім бастығы;

• 2009-2011 жж. – Әл – Фараби атындағы  ҚазҰУ-де аға оқытушы;

• 2011-2013 жж. – Қазақстан Республикасы Дін істері агенттігі, Алматы Дін істері департаментінің директоры (м.а.), Дін мәселелері бойынша ғылыми зерттеу және сараптама орталығында Исламды зерттеу бөлімінің бастығы, ҚР ДІА Діни оқу орындармен байланыстар және дінтану сараптамасы басқармасының Бас сарапшысы;

• 2015-2017 жж. – Нұр-Мүбарак Египет ислам мәдениеті университетінде доцент;

• 2013-2019 жж. ҚМДБ Уағыз-насихат, халықаралық байланыс және хаттама бөлімдерінің меңгерушісі;

• 2019-2024 жж. ҚМДБ төрағасының орынбасары, наиб мүфти;

• 2024 жж. Нұр-Мүбарак Египет ислам мәдениеті университетінің проректоры, Бас мүфти кеңесшісі.

Ғылыми еңбектері:

• Жарияланған ғылыми еңбектерінің саны - 30.

• Жарық көрген кітаптар тізімі - 27.

Университет миссиясы

Нұр-Мүбарак Египет ислам мәдениеті университетінің миссиясы – жоғары білікті, бәсекеге қабілетті мамандар дайындау, гуманитарлық және педагогикалық бағытта білім беру бағдарламаларын жүзеге асыру, қоғамның ғылыми және діни-рухани әлеуетін көтеру

Осы орайда университет ұлттық және халықаралық еңбек нарықтарында бәсекеге қабілетті және сұранысқа ие дін және тіл мамандарын қалыптастыру, білім беру және ғылымды дамыту арқылы елімізде және Орта Азияда діни тұрақтылық пен діннің дұрыс бағытта дамуына үлес қосу және қоғамның дамуында сапалы жаңа нәтижеге қол жеткізу секілді ұлық мақсатты алдына қояды.

Оқытушылық-профессорлық құрамы

	2018-2019 жж.	2019-2020 жж.	2020-2021 жж.	2021-2022 жж.	2022-2023 жж.	2023-2024 жж.	2024-2025 жж.	2025-2026 жж.
Отандық	73	85	88	100	100	106	111	132
Шетелдік	13	15	18	16	24	15	21	21
Жалпы саны	86	100	106	116	124	121	132	153

Факультеттер мен кафедралар

Ислам ілімдері факультеті

1. Исламтану кафедрасы
2. Дінтану кафедрасы

Филология факультеті

1. Жалпы білім беру пәндері кафедрасы
2. Шетел филологиясы және аударма ісі кафедрасы

Исламтану кафедрасы

Исламтану кафедрасы Ислам ілімдері факультетінің негізінде Нұр-Мүбарак Египет ислам мәдениеті университеті ашылған 2001 жылы құрылды. Оқытушылар саны – 64. Оның ішінде: ғылым докторы – 1,қауымдастырылған профессор доцент - 1, PhD доктор – 29 (оның ішінде қауымдастырылған профессор – 6); магистр аға оқытушы – 12; магистр оқытушы – 13, штаттан тыс – 8 оқытушы.

Исламтану кафедрасы 2001 жылдан бері жоғары білімді исламтанушыларды дайындап келеді.

2001-2012 жылдар аралығында кафедра меңгерушісі болып шариғат ғылымдарының докторы (PhD) Ато ас-Сынбати,

2013-2014 жылдары Шариғат ғылымдарының докторы (PhD) Атыия Фатхи Мұхаммед Əли əл-Фиқи қызмет етті.

2014-2017 жылдары кафедра меңгерушісі қызметін негізгі ислам білімдері ғылымының докторы (PhD), қауымдастырылған профессор Шамшат Амангелдіқызы Əділбаева атқарды.

2017 жылдан бастап кафедра меңгерушісі қызметін PhD Нұрлан Сайлауұлы Анарбаев атқарып келеді.

Алғашқы курстан араб тілі оқытылып, екінші курстан бастап араб тілінде Мысырдың əл-Əзһар университетінің ақида, фиқһ, хадис жəне тəпсір салаларының доктор, профессорлары дəріс береді. Сондай-ақ, отандық доктор, профессорлар:

• Исламдағы отбасы құқығы

• Матуриди ақидасы

• Тасауф ілімі

• Хадис әдіснамасы

• Исламдағы мирас мәселелері

• Құран ілімдеріне кіріспе

• Ислам ғибадаты

• Хадистану

• Ислам тарихы т.б. пəндер бойынша дəріс береді.

Дінтану кафедрасы

Дінтану бөлімі 2011 ж. дейін университетіміздің «Гуманитарлық және жаратылыстану пәндер» кафедрасының құрамында жұмыс жасап келді. Оқытушылар саны: 28. Оның ішінде: 3 – профессор, 4 қауымдастырылған профессор, 8 PhD, 7 магистр – аға оқытушы, 4 магистр – оқытушы.

Дінтану кафедрасының миссиясы – ЗЗайырлы мемлекет принциптері мен діни құндылықтарды үйлестіретін, дін мен қоғам қатынастары саласында  терең білімге ие бәсекеге қабілетті мамандар әзірлеу. Сонымен қатар, заманауи құзыреттіліктерді дамыту - діни, мәдени және философиялық мәселелерді талдау арқылы ұлттық құндылықтарды сіңіретін көшбасшыларды және тәуелсіз Қазақстанның болашағына үлес қоса алатын білікті мамандарды дайындау.

Кафедраның дербес ашылған жылы: 2011 жыл.

2011-2014 жж. – «Дінтану» кафедрасының меңгерушісі, теология ғылымдарының PhD докторы Әділбаев Алау Шайқымұлы;

2014-2020 жж. – «Дінтану» кафедрасының меңгерушісі, PhD, қауымдастырылған профессор Ержан Қалмахан Сейтұлы.

2020-2021 жж. – «Дінтану» кафедрасының меңгерушісі PhD доктор, қауымдастырылған профессор м.а Жұмашова Жұлдыз Аманбайқызы.

2021-2022 жж. – «Дінтану» кафедрасының меңгерушісі PhD доктор, доц.м.а. Дүйсенбаева Альбина Курахбаевна.

2022-2025 жж. – «Дінтану» кафедрасының меңгерушісі, PhD, қауымдастырылған профессор м.а. Рыскиева Айымжан Әбуқызы.

2025 ж. бастап – «Дінтану» кафедрасының меңгерушісі, PhD Тологон Жанболат.

Шетел филологиясы және аударма ісі кафедрасы

2001 жылдан 2018 жылға дейін «Араб тілі және әдебиеті кафедрасы», 2018 және 2022 жылдар аралығында «Араб және ағылшын тілдер кафедрасы» деп аталды. 2022 жылдың қыркүйек айынан бастап «Шетел филологиясы және аударма ісі кафедрасы» болып өзгертілді. Оқытушылар саны: 41. Оның ішінде 1 ғылым докторы, 14 PhD доктор, 6 ғылым кандидаты, 12 аға оқытушы, 8 магистр оқытушы.

Кафедраның академиялық миссиясы – академиялық және мәдениетаралық кәсіби коммуникация саласында екі шетел тілін, атап айтқанда араб/қытай және ағылшын тілдерін меңгерген, аударма ісі мен шетел филологиясы салаларында теориялық және қолданбалы білімін тиімді қолдана алатын, еңбек нарығында бәсекеге қабілетті мамандар даярлау болып табылады.

Кафедра меңгерушісі қызметін әр жылдары келесі тұлғалар атқарды:

2001-2007 жж. – кафедра меңгерушісі, PhD доктор Махмуд Фуад;

2007-2008 жж. – кафедра меңгерушісі, PhD доктор Махмуд Абдул Хафиз;

2008-2013 жж. – кафедра меңгерушісі, PhD доктор Абд ар-Рахман Саад Хасан Мұхаммед Хижази;

2014-2018 жж. – кафедра меңгерушісі,  оқытушы Нүсіпбаев Еркебұлан Бақытұлы;

2018-2021 жж. – кафедра меңгерушісі,PhD доктор Манабаев Багдат Маханұлы;

2021-2023 жж. – кафедра меңгерушісі, PhD доктор Жумашова Жұлдыз Аманбайқызы;

2023-2025 жж. – кафедра меңгерушісі, филология ғылымдарының докторы Рысбаева Гүлдархан Қалиқызы;

2025 ж. бастап – кафедра меңгерушісі, PhD доктор Ақшолақова Асем Жақсыбекқызы.

Жалпы білім беру пәндері кафедрасы

Ашылған жылы: 2001 жыл

Кафедра меңгерушісі қызметін әр жылдары келесі тұлғалар атқарды:

2001-2003 жж. – кафедра меңгерушісі, филология ғылымдарының кандидаты Ш.Калиева;

2003-2007 жж. – кафедра меңгерушісі, PhD доктор А.Әділбаев;

2007-2008 жж. – кафедра меңгерушісі, философия ғылымдарының кандидаты Б.Бейсенов;

2008-2018 жж. – кафедра меңгерушісі, педагогика ғылымдарының докторы, профессор Ш.Б.Бәйнеш;

2018 ж. бастап – кафедра меңгерушісі, филология ғылымдарының кандидаты, қауымдастырылған профессор Д.А.Капасова .

Кафедра оқытушылары гуманитарлық пәндерді оқытудың сапасын жетілдіру мақсатында қазақ және орыс тілі, тарих және ақпараттық коммуникативтік технологиялар пәндерінің өзекті мәселелеріне арналған оқу-әдістемелік семинар-тренинг, біліктілікті жетілдіру курстарын ұйымдастырып өткізіп, сонымен қатар халықаралық, республикалық ғылыми-тәжірибелік конференцияларға, ғылыми жобаларға қатысып, өз біліктіліктерін үздіксіз жетілдіріп отырады.

Оқытушылар саны: 29. Оның ішінде: 12 – ғылым кандидаты, 8 – PhD, 9 – аға оқытушы.

Мамандықтар

Университеттің білім беру бағдарламалары ҚР Ғылым және жоғары білім министрлігінің талаптарына сәйкес жасалынады. Университет 9 білім беру бағдарламасы бойынша мамандар дайындайды.

Бакалавриат деңгейінде:

6B02201 «Исламтану»

6B02202 «Дінтану»

6B02203 «Теология»

6B02301 «Шетел филологиясы»

6B02306 «Аударма ісі»

Магистратура деңгейінде:

7M02201 «Исламтану»

7M02202 «Дінтану»

Докторантура деңгейінде:

8D02201 «Исламтану»

8D02202 «Дінтану»

Аталған мамандықтар бойынша қос елдің ұстаздары дәріс береді. Алғашқы кезеңде араб әдебиетінің мамандары, педагогика, теология ғылымдарының докторлары сабақ берсе, бүгінде шариғаттың сан-саласын қамтитын ақида, фиқһ ғалымдарының дәрістеріне басымдық берілуде. Еліміздің дінтану, исламтану, гуманитарлық пәндер саласының ғалымдармен қоса Египет тарапынан ақида, фиқх, Құран ілімі бойынша докторлық дәрежедегі ғалымдар ұстаздық етеді.

2011 жылы «исламтану» мамандығының мемлекеттік стандарты бекітіленген соң, грант бөліне бастады. 2011 жылы 100 грант, 2012 жылы 100 грант, ал 2013 жылдан бастап 150 орын мемлекет тарапынан болашақ имамдарды әзірлеуге қолдау көрсетілуде.

Ал магистратура 2008 жылдан бастап университеттегі барлық мамандықтарға, 2012 жылдан бастап мемлекеттік тапсырыспен докторантура ашылды.

Лицензиясы

2010 жылдың 29 қыркүйегінде жоғары және жоғары оқу орнынан кейінгі кәсіби білім аясында білім беру қызметін жүргізу құқығы бойынша мерзімі шектеусіз №0137466 мемлекеттік лицензия берілді.

Контингент

Қабылданған студенттер саны

	2018-2019 жж.	2019-2020 жж.	2020-2021 жж.	2021-2022 жж.	2022-2023 жж.	2023-2024 жж.	2024-2025 жж.	2025-2026 жж.
Бакалавриат	442	500	518	537	665	2181	2421	2836
Магистратура	37	24	40	58	36	34	39	116
Докторантура	21	8	8	10	6	9	12	41

Бөлінген гранттар саны

Мемлекеттік гранттар саны

	2018-2019 жж	2019-2020 жж	2020-2021 жж	2021-2022 жж	2022-2023 жж	2023-2024 жж	2024-2025 жж	2025-2026 жж
Бакалавриат	210	280	183	181	172	834	834	1043
Магистратура	18	16	25	50	20	27	41	41
Докторантура	18	8	7	8	6	9	20	20

Ғылым және инновация департаменті

Ғылым және инновация департаменті – Нұр-Мүбарак университетін еліміздегі исламтану және дінтану салаларындағы жетекші ғылыми орталық ретінде қалыптастыру және осы салалардағы халықаралық академиялық қауымдастықпен ынтымақтастықты нығайту арқылы университет оқытушы-профессорлық құрамының ғылыми әлеуетін көтеру мақсатында 2020 жылы құрылды. 

Атқаратын жұмыстары:

– НМУ ғалымдарына ҚР ҒЖБМ ҒК тарапынан жарияланған фундаменталды ғылыми зерттеу жобалары мен қоғам сұранысынан туындаған қолданбалы зерттеу жұмыстарына жан-жақты қатысуына әдістемелік, техникалық қолдау көрсету;

– Исламтану және дінтану салаларындағы басым ғылыми бағыттардың дамуын ынталандыру мақсатында жүйелі ғылыми-методологиялық семинарлар ұйымдастыру;

– Араб-Мұсылман әлемі және Түркия елдеріндегі исламтанулық және дінтанулық мектептер мен ғылыми орталықтармен ғана емес, сонымен қатар батыстық (американдық, еуропалық) исламтану институттарымен академиялық байланыс құру;

– Университеттің ғылыми жұмысына сыртқы спонсорлық қорлар мен қаржылық қолдауды тарту;

– Студенттер, магистранттар және докторанттардың университеттің ғылыми өміріне белсенді қатысуын түрлі жолдармен ынталандыру.

– Университет ғалымдарының исламтану және дінтану салаларымен қатар, әлеуметтік ғылымдардың басқа да салаларындағы пәнаралық ғылыми жобаларды дамытуға, ұйымдастыруға қолдау көрсету.

Академиялық мәселелер жөніндегі департамент

Академиялық мәселелер жөніндегі департаментінің негізгі мақсаты -  білім беру үрдісін жетілдіру, сапалы білім беру  үшін оқу- әдістемелік жұмысты ұйымдастыру, оқу әдістері мен оның белсенді үлгілерін, бүгінгі күнгі білім беру және ақпараттық-байланыс технологияларын меңгеру, жинақтау және тәжірибеге енгізу;

- Білім  беру үдерісінде  оқу үдерісін ұйымдастыру және оқу-әдістемеліктермен қамтамасыз ету;

- Білім беру бағдарламаларын Болон үдерісінің талаптарына сәйкес жобалауды ұйымдастыру;

- Оқытушы-профессорлар құрамы  әзірлеген оқу-әдістемелік материалдар мен білім бағдарламаларының мазмұнына сараптама жасау жұмыстарын  ұйымдастыру  және өткізу;

- Университеттің перспективалық  даму жоспарын дайындауға ұсыныс беру;

- Оқу құжаттарын мемлекеттік және университеттік нормативтік базамен сәйкестендіру және бекітілген нормаларды сақтауды қадағалау;

- Оқу үдерісінің  көрсеткіштеріне  жүйелі түрде  талдау  жасау.

Академиялық мәселелер жөніндегі департаментінің директоры - Мухаева Балжан Аманжолқызы.

Ғылыми кеңес

Нұр-Мүбарак Египет ислам мәдениеті университетінің Ғылыми кеңесі алқалы басқару органы болып табылады. Университет Ғылыми кеңесінің қызметі жариялылық пен өз құзырындағы мәселелерді ұжымдық талқылау қағидаларына сүйенеді.

Ғылыми кеңестің құзыреті:

• университет құрылымын бекітеді;
• университет қызметін реттейтін нормативтік актілерді қабылдау және оларға өзгерту мен толықтырулар енгізеді;
• университеттің даму стратегиясы мен тұжырымдамасын белгілейді;
• университеттің оқу-тәрбие, ғылыми-зерттеу, халықаралық, қаржы, әкімшілік-шаруашылық қызметтерін ұйымдастырудың барлық негізгі мәселелері бойынша шешімдер қабылдайды;
• оқытудың барлық сапасы мен формаларының оқу жоспарларын бекітеді;
• оқулықтар, оқу құралдары және оқу-әдістемелік құралдарды шығаруды қарастырады және ұсыныс жасайды;
• студенттерді ақылы бөлімнен білім беру грантына және экстернат формасында білім алуға ауыстыру туралы шешімдер қабылдайды;
• қауымдастырылған профессор және профессор ғылыми атағын беруге ұсынады;
• университет қызметкерлері мен шығармашылық ұжымын мемлекеттік, үкіметтік марапаттарға және құрметті атақтарға ұсыну туралы мәселелерді қарастырады;
• университеттің алқалық шешімді қажет ететін ағымдағы басқа да мәселелерін қарастырады.

Ғылыми-зерттеу орталығы

Халықаралық ғылыми зерттеу және инновация орталығы

Халықаралық ғылыми зерттеу және инновация орталығы (бұдан ары – орталық) – «Нұр-Мүбарак» Египет ислам мәдениеті университетінің (бұдан ары – университет) Ғылым және халықаралық ынтымақтастық департаментіне қарасты құрылымдық бөлімше.

Орталық мақсаты – жүргізілетін іргелі, қолданбалы және инновациялық негіздегі ғылыми-зерттеу жұмыстарын  жүргізу.

Орталық қызметінің міндеттері:

- ЖОО жоспарының негізгі бағыттары бойынша іргелі және қолданбалы ғылыми-зерттеу жұмыстарын ұйымдастыру және үйлестіру;

- Ғылыми зерттеу жұмыстарын жүзеге асыруда Университет алдында тұрған міндеттердің тиімді орындалуын қамтамасыз ету мақсатында ғылыми-ұйымдастырушылық жұмыстарды әзірлеу, талдау және ақпараттарды таратуды ұйымдастыру;

- Оқу орнының ғалымдардың ғылыми-зерттеу жұмыстарының деңгейін, ғылыми-техникалық әлеуеті мен бәсекеге қабілеттілігін арттыруға көмектесу;

- ҚР Ғылым және жоғары білім министрлігі тарапынан  гранттық және бағдарламалық қаржыландыру  шеңберіндегі ғылыми және (немесе) ғылыми-техникалық жобалар конкурстарына қатысу;

- Ғылыми-теориялық, ғылыми-практикалық, ғылыми-әдістемелік конференциялар, симпозиумдар, семинарлар, кеңестер және өзге де ғылыми іс-шаралар ұйымдастыруға атсалысу;

- Халықаралық және республикалық ғылыми байланыстарды жүзеге асыру;

- Жаңа технологиялар мен инновациялық шешімдерді енгізу және дамыту үшін жобалар мен стартаптарды қолдау;

- Шетелдік ғылыми-зерттеу орталықтарымен және университеттерімен серіктестік орнатып, халықаралық деңгейде ғылыми зерттеулер жүргізу;

- Ғылыми зерттеулер мен инновацияларды дамыту үшін қажетті ақпараттық ресурстар мен әдістемелік материалдар ұсыну.

Орталық жетекшісі

Филология ғылымдарының докторы, профессор Керім Шәмшадин Тұрсынұлы.

Ғылыми жұмыстар

Ғылыми жұмыс жоспарлары ҚР Ғылым және жоғары білім министрлігінің, университеттің нормативтік актілері мен құжаттары негізінде жасалады. Жалпы білім беру пәндері кафедрасы «Білім беру арқылы оқыту мен тәрбиелеу бірлігі ұстанымын жүзеге асыру», «Шетел филологиясы және аударма ісі» кафедрасы «Салыстырмалы-тарихи, типологиялық және салыстырмалы тіл білімі», «Әдебиет теориясы, риторика», «Шетел тілдерін оқыту әдістемесі» атты ғылыми тақырыптар ауқымында және де «Дінтану», «Исламтану» кафедралары ханафи мазһабы аясында жұмыс жасайды.

Халықаралық ынтымақтастық

Нұр-Мүбарак Египет ислам мәдениеті университеті – Қазақстандағы ислам дінінің  білімі мен ғылымының туын көтеріп, іргетасын  қалаушы жоғары білім ордасы. 20 жылдық тарихында жаңадан бой көтеріп, әлемдегі әріптес ЖОО-мен иық тіресетін жағдайға қол жеткізді. Соның бір айғағы Халықаралық  дәрежеде институттармен ынтымақтастық қарым-қатынас орнатып, маман даярлап, ұстаздардың біліктілігін арттыруда өзара үндестік табуда.

Қазақстан мұсылмандары діни басқармасымен бірге  шет елдік оқу орындарымен тығыз байланыста. Шет елде білім алушы қазақстандық студенттерді қадағалаумен қатар әріптес ЖОО-мен қарым-қатынасты үнемі пысықтап келеді.

Академиялық алмасулар мен өзара білім алушыларды оқыту мен машықтандыру мақсатында ынтымақтастық келісімшарттары мен меморандумдар аясында ТМД елдері мен алыс шетелдердің жетекші ЖОО-мен ұзақмерзімді байланыс орнатылған. Нәтижесінде, магистратура, докторантура білім алушылраына қосымша Түркия, Ресей, Малайзияның белді университеттерінен ғалымдар келіп дәріс оқиды. Әлем университеттерінің академиялық рейтингі бойынша іріктелген 500 жоғары оқу орындарының санатындағы Каир университетінің профессорлары жыл сайын арнайы шақырылып, магистр-докторанттарға екі апталық лекция-семинар өткізеді. Бір ЖОО және 4 алыс шетелдегі ғылыми және ғылыми білім беру орталықтарымен келісім жасалғандықтан, соңғы 3 жылда Нұр-Мүбарак университетіне 11 ғалым арнайы шақырылып дәрістер өткізді. Университет Египеттің әл-Азһар, әл-Хелуан, Түркияның Стамбул, Мармара, Селжұқ, Неджеттин Эрбакан университеттерімен, Қырғызстан ислам университеті, Мәскеу ислам институтымен өзара әрекет пен ынтымақтастық жөнінде келісімшартқа қол қойды. Ал Малайзияның Ұлттық Сұлтан Зайнал Абидин университеті мен Қазан қаласындағы Ресей ислам институттарымен екіжақты меморандумдарға қол қойды.

18 ұлттың өкілі оқитын Нұр-Мүбарак университеті ТМД бойынша ғана емес, Орталық Азиядағы ислам ғылымын тереңдетіп оқытып, зерттеуші бірегей ЖОО-на айналды. Әрине бұл бүгінгі есеппен 13 жыл десек те, негізгі тарих тамыры сан ғасырлық тереңдікте жатыр. Өйткені әу бастан Имам Ағзам Әбу Ханифа мәзһабын ұстанған ата-бабаларымыз ислам өркениетін дамытып, бай мұра қалыптастырып қана қоймай, сонау араб елдеріндегі кітапханаларда өз қолтаңбаларын қалдырған. Міне көне қолжазбаларды зерттеп, атажұрттың игілігіне қолдану Нұр-Мүбарак университеті ғалымдарыныің жоспарлы межелерінің бірі.

Нұр-Мүбарак мешіті

ҚР Білім және ғылым министрлігінің мемлекеттік аттестациялауының барлық талаптарына сай келген университеттің өз мешіті бар. Мешіт 2001 жылы ресми ашылды. Мешіттің жалпы көлемі 1233,9 шаршы метр. Мешіттің бірінші қабатында ерлер 700 адам намаз оқи алады. Екінші қабатында әйелдергеде арналған жеке намаз оқитын орын 300 адамға арналған. Мешіттің бір мұнара бір күмбезі бар. Мешіттің екінші қабатында сынып бөлмелері және бірінші қабатта арнайы имамдар бөлмесі бар. Сонымен мешіттің жалпы сиымдылығы 1000 орынға жетіп отыр.

Нұр-Мүбарак мешіті – студенттерге шариғи уағыз-насихат айтқызу бойынша тәжірибелік тұрғыдан шыңдаумен шектелмейді. Белгілі діни қайраткерлермен кездесулер ұйымдастырып, аптаның жұма күндері және қасиетті айлар мен Құрбан айт, Ораза кезінде жалпы жұртшылыққа есігін айқара ашады.

Университет кітапханасы

Университет кітапханасы оқулықтар мен электрондық басылымдар қоры жинақталған, оқырмандар мен  кітапхана қызметкерлері үшін қолайлы ақпараттық-білім беру ортасы болып табылады. «Нұр-Мүбарак» Египет ислам мәдениеті университетінің кітапханасы оқу залы, абонемент бөлімі, электрондық кітапхана, жатақхана кітапханасы және арнайы қор бөлімдерінен тұрады.

Университеттің жетекші құрылымдық бөлімдерінің бірі ретінде кітапхана оқу-тәрбие үдерісін қажетті ақпараттық ресурстармен қамтамасыз ететін маңызды білім орталығы саналады. Қазіргі таңда кітапхана оқырмандарға тұрақты қызмет көрсетіп келеді. Кітапхана құрамында 118 515 дана кітап қоры бар оқу залы жұмыс істейді.

Заман талабына сай сапалы кітапханалық қызмет көрсету, жаңа ақпараттық технологияларды кітапхана жұмысына кеңінен енгізу, сондай-ақ кітапхананың қоғамдағы негізгі ақпараттық орталық ретіндегі рөлін арттыру – кітапхананың басты мақсаты. Сонымен қатар әмбебап құжаттар мен ақпарат көздерінің толық жинағын оқырмандарға қолжетімді ете отырып, әлемдік, ұлттық, мәдени және рухани құндылықтарды насихаттау кітапхананың негізгі міндеті.

Кітапхана қызметін дамыту және стандарттарға сай кітапханалық жүйе қалыптастыру мақсатында «КАБИС» автоматтандырылған ақпараттық-кітапханалық бағдарламасы негізінде электрондық каталог жүйесі жұмыс істейді. Аталған бағдарлама кітапхана қорын жинақтау мен өңдеу үдерістерін жүйелеуге, электрондық каталогтар базасын қалыптастыруға және пайдаланушыларды қажетті ақпаратпен қамтамасыз етуге бағытталған.

Университет кітапханасының қоры араб, қазақ, орыс және ағылшын тілдеріндегі оқу, оқу-әдістемелік, ғылыми және көркем әдебиеттерден, мерзімді басылымдардан, ақпарат тасымалдағыштардан, компакт-дискілер мен электрондық оқулықтардан тұрады. Сонымен қатар кітапхана қоры «Қазақстан Республикасы жоғары оқу орындарының қауымдастығы»,                             М. Әуезов атындағы Әдебиет және өнер институты, «Рухани жаңғыру» бағдарламасы аясында жарық көрген әлемнің жетекші 100 жаңа оқулығымен, «Ұлттық аударма» бюросы шығарған еңбектермен, университет баспасынан жарияланған оқытушылардың ғылыми жұмыстары және жыл сайын өткізілетін «Исламтану және араб тілі мәселелері» атты халықаралық ғылыми-тәжірибелік конференция материалдарымен тұрақты түрде толықтырылып отырады.

Университет жатақханасы

Университетте 2014 жылдан бастап пайдалануға берілген 610 орындық жатақхана бар. Бірінші кезекте 1-курс студенттері жатақханамен толықтай қамтамасыз етіледі. Қалған курстарға әлеуметтік жағдайына байланысты беріледі.

Университет жетістіктері

2018-2022 жж. аралығындағы оқу үдерісіндегі жетістіктер:

• Ұлттық рейтингте ТОП-20 университет қатарына кірді.
• Ұлттық рейтингте В033-Дінтану және Теология (Исламтану, Дінтану) І орын.
• 2022 жылға арналған талапкерлерді қабылдау бойынша олимпиада ұйымдастырылды.
• Сұранысқа сай ихсан ілімі, ислам экономикасы, дерадикализация мәселелері, исламдағы рационалды ой-сана, т.б. жаңа пәндер қосылды.