Ойбай, бегім бер (күй)

Ойбай,бегім бер- күй, Қ.Кәлектен жазылып алынды. Нотаға түсірген А.Хабыкей. Күй туралы аңыз: Бай баласы мен кедей баласы серіктесіп бек теруге шығады. Ішер ас пен мінер көлікке қысылып көрмеген бай баласы ер-тұрманы келіскен атқа мініп шығады да, аяқ артары жоқ кедей баласы жаяу шығады. Бірақ бай баласы артынан еріп жаяу салпақтап, болдырып келе жатқан кедей баласына байлығы мен салтанатын көрсеткендей ат үстінде шалқалай отырып, оны мінгестіріпте алмайды.Туғаннан тақыршылық азабын көріп өскен кедей баласы аттылы бай баласынан қалыспай жүріп отырып бек теретін жерге де жетеді. Жол ортасынан асқан кезде жаяу баламен қатарласып келе жатқан бай баласы кедей баласының бетін іліп алады да атын тебініп қап,шаба жөнеледі. Біршама жер жүріп шаршаған кедей баласы оның артынан "Ойбай,бегім бер"-деп айқайлап қуады. Аттылы жаяуға қайдан жеткізсін. Бай баласы бекті сол күйі алып қашып кетеді. Кедей баласының: "Ойбай, бегім бер", - деп айғайлағанын естіген күйші бала зарын бейнелеп, осы күйді шерткен екен дейді.