Петр Филиппович Матущак

Матущак Петр Филиппович (7.11.1927 ж. т., Қамысты ауд. Ливановка а.) — палуан, проф. (1994). Қазақстанның еңб. сің. мәдениет қызметкері (1990), Қаз. КСР-інің (1961) және КСРО-ның (1962) еңбек сіңірген жаттықтырушысы. 1954 ж. Қазақ дене тәрбиесі ин-тын (қазіргі Қазақ спорт және туризм академиясы) бітіріп, осы институтта ғылыми-педагогикалық жұмыстармен (1954 — 1978) және жаттықтырушылық қызметтермен айналысқан. Матущак еркін күрестен КСРО құрама командасын Индонезияға (1973), Үндістанға (1965), Қазақстанның құрама командасын Германияға (1961), Моңғолияға (1962 — 63), Кубаға (1972, 1974) бастап барды және осы елдердің арнайы шақыруы бойынша қысқа мерзімдік практикалық көмек көрсетті. Ұстаздық еткен жылдарында еркін және грек-рим күресінен 103-тен астам КСРО спорт шеберлерін даярлады. Матущак “Еркін күрестің 100 сабағы”, “Қазақша күрес”, “Қажымұқанның ізбасарлары”, “Қазақстан спортшылары Олимп шыңында”, “Тұрлыхан ұрпағынан шыққан батыр”, “Қабден Ақтамберді батырдың ұрпағы”, “Жақсылық — Қажымұқанның ізбасары”, “Қазақстанның олимпиадалық мақтанышы”, “Жетісудан шыққан чемпиондар” атты әдістемелік оқулықтардың авторы. 1998 жылдан Респ. спорт және олимп. даңқ мұражайының директоры.“Парасат” орденімен (2000) марапатталған. Ж. Хисымов