Пошта техникасы^[1] — пошта байланысындағы негізгі өндірістік жұмыстарды — поштамен жіберілетін заттарды қабылдау (жинау), сұрыптау, тасымалдау және көрсетілген мекен-жайға жеткізу қызметтерін атқаруда пайдаланылатын құрылғылар мен көлік құралдары. Ең қарапайым пошта техникасы 1653 ж. француз Ренуар де Виллайс ұсынған пошта жәшігі. 16 ғасырда арнайы пошта экипажы — ат-арбасы пайда болды. 19 ғ-дың басында ат арбаны атпен сүйретілетін рельстік экипаж ауыстыра бастады. 19 — 20 ғ-лардағы темір жол, су, автомобиль, әуе көліктерінің күрт дамуы пошта тасымалдауларының қарқынды дамуына алып келді. Поштамен жіберілген заттарды пошта бөлімдерінде қабылдау және тарату, ақша аудару жұмыстары арнайы пошта-кассалық машиналар көмегімен атқарылады. Олар ақша аудару, бағалы хаттарды, бандерольді, жеделхат жіберу, т.б. қызметіндегі қабылдау және тарату операцияларын, түбіртек беруді, тіркеуді жүзеге асырады. Ақпараттық технологияның дамуы қызметтердің басым бөлігін толық автоматтандыруға, орындалу уақытын азайтуға мүмкіндік берді. Қабылдаған заттарды өңдеу, сұрыптау жұмыстары үшін үлкен пошта бөлімдерінде жартылай автоматтандырылған арнайы сұрыптаушы машиналар, оларды пошта бөлімі ішіндегі қажет жерлерге тасымалдау, тарату үшін таспалық және шынжырлы (тізбекті) конвейерлер және т.б. техника түрлері қолданылады. Хаттар (жазбаша хабарлар) арнайы белгі, штемпель салушы — өңдеуші машинаға беріледі. Одан хатсұрыптағыш автоматқа беріліп, онда цифрлық-әріптік ақпарат шартты кодқа (люминесцентті нүктелер не сызықтар) түрленеді де, арнайы машина көмегімен қажетті жинағыштарға бағытталады. Посылкаларды сұрыптау үшін таратушы конвейерден, жинағыштан және басқару пунктінен тұратын жартылай автоматтандырылған сұрыптаушы машиналар қолданылады. Пошта тасымалдарын жеткізу үшін осы заманғы көліктердің барлық түрлері пайдаланылады. Арнайы пошта вагондары мен өзі жүк артатын автомобильдер, кемелер арқылы контейнерлік тасымалдау әдісі дамуда. Ұшақтарды пайдалану пошта қызметінің орындалу мерзімін бірнеше есе азайтуға мүмкіндік берді. Ақпараттық технологияның дамуы, олардың Пошта техникасына қолданылуы, жасанды Жер серіктері арқылы барлық пошта бөлімдерін бір жүйеге қосу аз шығынмен әлемдік сапа стандарттарына сәйкес қызмет көрсетуге жол ашты.