Примула тұқымдасы

Примула тұқымдасы (Prіmulacea) — қос жарнақтылар класына жататын бір және көп жылдық шөптесін өсімдіктер мен кейбір аласа ағаштар, бұталар, шырмауықтар. Жер шарында кең тараған 30 туысы, 1 мыңнан астам түрі белгілі. Қазақстанда 10 туысқа бірігетін 33 түрі бар. Бұлардың жай жапырақтары сабақ түбінде шоғырланып орналасады. Сабақтары жай немесе бұтақтанған, гүлі қос жынысты, гүл шоғы жеке-жеке немесе сыпыртқы, кейде шашақ не шатыр тәрізді топтанған. Аталығы — 5, күлтенің түтігінде орналасқан, жатын түйіні жоғары, бір ұяшықты болады. Негізінен жәндіктермен (өздігінен сирек) тозаңданады. Жемісі — қорапша. Талқурай туысының тамыр сабағы сапонинге, табиғи бояуға бай. Көздәрі туысы — улы өсімдіктер. Бұл тұқымдастың ең маңызды туысы — примула.