Пушкин көшесі (Тараз)

Пушкин көшесі – Тараз қаласының көне де негізгі көшелерінің бірі. Орыс көшесі деп аталып, Түйте каналымен қосарласа солтүстік-батыс бағытқа қарай созылып жатты.

Сипаттамасы

Кварталдары тура, әрі кең болып келетін көшенің бойында бір қабатты шағын тұрғын үйлер, мекемелер мен сауда орындары салынды. 19 ғасырдың 90-жылдарында, 20 ғасырдың басында бой көтерген архитектуралық ескерткіштер, мысалы, банкі үйі (№33, 1902) қиратылды. Кейінгі классицизм (үйдің бет алдын симметриялық бөлу, терезелерінің аркалы болып келуі, т.б.) дәстүрінде салынған үй кірпіштерді сан түрлі құбылтып қалаудан тұрған еді. Оның орнына қазір шыны мен бетоннан салынған банкінің биік үйі бой көтеріп тұр.

Үйлері

Пушкин көшесін бойлап Герцен көшесі мен Абай көшесінің аралығында 19-ғасыр соңы мен 20-ғасыр ортасында тұрғызылған үйлер (№№9, 13, 18, 19, 20, 21, 23) сақталынып қалған. №9 тұрғын үй болып саналса, №18 үй – дәріхана; №20 үй – «Букинист» дүкені, ғ23, 25 үйлер – Г әрпі түрінде бір-бірімен жалғасып, сауда залдарын құрайды; №30 үй – балалар бақшасы, №31 үй – балалар ауруханасы; 20 ғ. 20 – 50 жылы салынған №160 үйде мәдени-ағарту училищесі орналасқан.