Радиолокациялық бүркеніш

Радиолокациялық бүркеніш — қарсыластың радиолокациялық станцияларымен әскери объектілерді табуын қиындату немесе болдырмау шараларының жиынтығы; бүркеніш түрі.

Радиолокациялық бүркеніш радиолокациялық станциялардың шектелген шешуші мүмкіндігін (бір-біріне жақын орналасқан екі немесе бірнеше нысаналарды экранда жеке көрсету мүмкіндігі) пайдалануға, сонымен қатар әскери техникалардан, кейбір жергілікті заттардан және түрлі жасанды шағылдырғыштардан шағылған сигналдар радиолокациялық станциялардың экранында бірдей көрінетіндігіне негізделген.

Радиолокациялық бүркеніш объектілердің және қоршаған фонның радиолокациялық қарама-қарсылығына байланысты объектілерді жасыру және ұқсатумен, сондай-ақ радиолокациялық станциялар экрандарында объектілер бейнелерін қоршаған жергілікті жер фонына "келтіру" арқылы жүзеге асырылуы мүмкін.

Әскери техника объектілерінің радиолокациялық қарама-қарсылығы радиожұтқыш заттарды қолданумен және электрмагниттік қуаттың шашылуының тиімді ауданы ең кіші жағдайға сай сырт формаларды берумен кішірейтілуі мүмкін. Жасыру техника мен құрылыстарды жергілікті жер биіктіктерінен және жергілікті жер заттарынан кейін немесе оларды радиолокациялық станцияның шешуші мүмкіндігі қашықтығына жақын қашықтықта орналастыру, радиотолқын өткізбейтін заттардан (темір тор, ағаш бұта, өсімдіктер және басқалар) жасалған бүркеніш-экрандарды қолдану, техниканың орналасү (жылжу) орнына жақын жерде радиолокациялық станцияларға енжар кедергі жасау үшін шағылдырғыштар қою арқылы қол жеткізіледі.

Объектілерді ұқсату мен жергілікті жерде жалған жағдай жасау радиолокациялық шағылдырғыштар немесе арнайы жалған радиолокациялық нысаналар қоюмен жүзеге асырылады.