Радиоқабылдау бөгеуілдер

Радиоқабылдау бөгеуілдер —радиоқабылдағыш тізбектеріне теріс ықпал ететін, бірақ пайдалы сигналға қатысы жоқ және радиоқабылдағыштардың соңғы элементтерінде байқалатын қажетсіз құбылыстар. Мысалы, қатты сөйлегіштерден естілетін қажетсіз бөгде дыбыстар немесе шуылдар; телевизор экрандарында қажетсіз жарықтар тугызатын бөгде әрекеттер. Басқа радиостанциялар жұмысынан туындайтын периодты бәгеуілдермен қатар апериодты кездейсоқ бөгеуілдер де кездеседі. Ұзақтығына қарай олар қысқа мерзімді немесе тез әрекетті, қайталану процесіне қарай — импульстік болуы мүмкін.

Атмосферада орын алатын табиғи электр құбылыстары — электрразрядтары (найзағай), түрлі ғарыштық сәулелер, радиоактивтік сәулелер, радиотолқындар және т.б. әрекеттер — радиоқабылдау кезіндегі атмосфералық бөгеуіл ретінде танылса, түрлі ендірістік қондырғылар мен электр көліктері жұмыстарынан туындайтын электромагниттік әсерлер ендірістік бөгеуілдер ретінде танылады. Сонымен қатар радиотехникалық құралдарда пайдаланылатын активтік элементтер мен өткізгіштердің өздеріне тән ішкі(жылулық) шуылдары да бөгеуілдер болып табылады.