Ракеталық ядролық қару

Ракеталық ядролық қару — жаппай зақымдаушы қару. Мұнда зақымдаушы құрал ядролық қару, ал нысанаға жеткізу құралдары — ракеталар. Ракеталық ядролық қару шешетін міндеттерінің сипатына қарай стратегиялық, оперативті-тактикалық және тактикалық болып бөлінеді, ол жер үстіне, теңізге немесе әуеге орналастырылуы мүмкін. Оны қолданудың негізгі әдістері — дұшпанды қысқа мерзімде бет қаратпайтын жеңіліске ұшыратуға, күштердің арасалмағын және жағдайды тұтас алғанда өз пайдасына өзгертуге мүмкіндік беретін жаппай ракеталықядролық соққылар беру, сондай-ақ топтама және жекелеген соққылар берілуі мүмкін.

Ракеталық ядролық қарудың негізгі қасиеттері — іс жүзінде шексіз алысқа ұшатындығы, орасан зор зақымдаушы күші, күтпеген жерден қолданылу мүмкіндігі, нысаналарды зақымдаудың өте жоғары дәлдігі, ұшудың өте жылдамдығы және биіктігі, ұшу кезінде сыртының шағылыспайтындығы, ракеталарды ұшуға әзірлеудің көзден тасалығы және қолданудың ауа райы жағдайлары мен уақытка тәуелсіздігі.

Ракеталық ядролық қарудың зақымдаушы факторларынан қорғану әдістері: адамдарды паналау ғимараттары мен радиациядан қорғайтын паналау орындарына жасыру. Барлық халық тыныс органдары мен денені корғайтын жеке қорғаныс құралдарымен қамтамасыз етіледі. Халықты көшіру шараларын дер кезінде және толық жүзеге асыру дұшпанның ракеталық ядролық қаруды қолдану тиімділігін барынша азайтады. Бірақ адамдар мен жануарлар арасында орасан зор шығын келтіруі, көп мөлшерде материалдық игіліктерді, тұтас қалалар мен ірі өнеркәсіп объектілерін жоюы мүмкін.