Саркодина

Саркодина ( Sarcodіna ) — қарапайымдардың саркомастигофоралар типіне жататын бір класы. Жер шарында кең тараған. 3 класс тармағына (тамыраяқтылар, сәулетәрізділер, күнтәрізділер) жататын 10 мыңнан аса түрі бар. Теңіздерде, тұщы суларда, ылғалды топырақтарда кездеседі. Адам мен жануарлар денесінде паразитті тіршілік ететін түрлері де бар (мыс., дизентерия амебасы). Саркодиналардың денесінің сырты плазмалеммамен қапталған. Көпшілік түрінде, сауыт тәрізді ішкі және сыртқы қаңқасы болады. Барлық өкілдері жалған аяқтары, яғни псевдоподиялары арқылы қозғалады. Ядросы біреу, кейде бірнешеу. Тұщы суда тіршілік ететін түрлерінде жиырылғыш вакуолдері бар. Бактериялармен, балдырлармен және қарапайымдармен қоректенеді. Жыныссыз (екіге бөліну, кейбіреулері бүршіктену арқылы) және жынысты (гамета түзу арқылы) жолмен көбейеді. Көптеген Саркодиналар циста түзеді.