Сарыраушан

Сарыраушан(Solіdago) — күрделігүлділер тұқымдасына жататын көп жылдық шөптесін өсімдіктер мен бұталар. Дүние жүзінде 100-ге жуық түрі белгілі. Қазақстанда ормандарда, шалғынды және далалық аймақтарда, бұталардың арасында, таудың тастақты беткейлері мен өзен жағалауларында, саяжайлар мен бақтарда өсетін 2 түрі: кәдімгі Сарыраушан (S. vіrgaurea) және канада Сарыраушаны (S. canadensіs) бар. Олардың биікт. 2 м-ге жуық, сабағы жіңішке, тік өседі, жоғ. жағы бұтақтанған. Тамырынан өсіп шыққан жапырақтарының сабақшалары ұзын, сабағының жоғ. жағындағылары сопақша, отырмалы болады. Сары түсті себет гүлдері сыпыртқы гүлшоғырына топталған. Тамыз — қазан айларында гүлдеп, қарашада жемісі піседі. Жемісі — айдары бар тұқымша. Сарыраушанның құрамында илік заттар, сапониндер, эфир майлары, флавоноидтар (рутин, кемпферол, т.б.), алкалоидтар бар. Медицинада Сарыраушаннан жасалған препараттар қан тоқтату, несеп жүргізу, терлету үшін пайдаланылады. Бүйрекке тас байланғанда, ревматизм, подаграны емдегенде ішеді. Сарыраушан бал беретін, мал азықтық және әсемдік үшін өсірілетін өсімдікке жатады.