Сасықкекіре

Сасықкекіре (Tournefortіa) — айлауық тұқымдасына жататын көп жылдық өсімдіктер. Қазақстанның барлық облыстарындағы далалық аймақтарда, шөлді, құмды, сортаңды жерлерде, өзен жағалауларында өсетін 2 түрі: Сібір Сасықкекіресі және Соғда Сасықкекіресі бар. Ең көп тарағаны — Сібір Сасықкекіресі (Т. sіbіrіca). Оның биікт. 10 — 40 см, тамыр сабағы көлбей өседі. Сабағының сыртын түк жауып жатады. Бүтін жиекті жапырағы сағақсыз (ұзындығы 1 — 3 см), кезектесіп орналасқан. Тостағанша жапырақшалары бес бөлікке бөлінген, күлтесі ірі, бес мүшелі, қоңырау тәрізді, ақ сары түсті. Сәуір — маусым айларында гүлдеп, жеміс салады. Жемісі жұмыртқа тәрізді (ұзындығы 8 мм-дей), сыртын түк жапқан, піскенде екіге бөлінеді.